Shillong: Ka Khasi Hills Autonomous District Council (KHADC) da rah biang ko wow bichaar ya u Syiem ka Hima Nongspung, u Patrick Syiemiong wa ya u Secretary ka Hima, u Michael Warjri cha ka 28 tarik uni u bnai, wei katai u man ko ka tarik wa khaddooh wa ka Council u bichaar wei u chim yaka rai ya kitai ki ar ngut kiwa yahkhmat ka Hima heiyatoh wa i kynrum kynram wa da mih na i e No Objection Certificate (NOC) wow chna ya ka sarok da ka Assam ha New Balakhowa kawa em ha Ri-Bhoi District.
Hei yaklam wa ki laad pathai khubor u Dy. CEM ka KHADC uwa ksoh leh yaka chnat Elaka, u Pyniaid S Syiem da ong u wa i rah ya ka tarik wow bichaar hajrong ka kynrum kynram wa da mih ha New Balakhowa toh neidaw wa u Michael Warjri khlem ye u poi cha ka khut hajir ka KHADC, wei da pyntip u wa ym em chait u wei dang chah sumaar u ha NEIGRIHMS.
“Ynne ka sngi ym pu ye i wow chim yaka rai hajrong i pynbaad mar kylliang hadien i jia ha New Balakhowa neidaw wym poi waroh arliang. Chwa wow chim ya kawon kawon ka rai, i kwah i wow sñiaw ya waroh arliang, i da booh i yaka tarik wa khaddooh wow khut hajir ha ka 28 tarik uni u bnai yow emlang waroh arliang,” da pyntip u Dy. CEM wei da pynrap u leh deiwa ong, “Lada ki wan næ ym wan ki hap wow chim ya ka rai ha katai ka sngi.”
U Pyniaid da ong u wa ha ka 28 tarik ka Council u chim ko yaka rai hajrong kini ki ar ngut deiwa ap wow sñiaw lang na waroh arliang wei lada waroh arliang ym poi ki ha katai ka sngi ka KHADC daw chim bait ko yaka rai khnang wow che noh kani ka kaam hakhmat ki paidbah.
Heijooh i por u Dy.CEM da pyntip u wa neiliang u Patrick Syiemiong da e I dei thoh wa ym tip u iyi iyi leh yei e NOC wow pynkreh ya ka sarok kamwa da pynbaad da u Michael.
“Neiliang u Syiem wa ki Lyngdoh da pynksan bait pynda ki ya ki hi wa ym toh ki kiwa e NOC, wei da e u dei thoh wa ym embynta ha kani ka kaam kamwa da kynnoh da u Secretary hawa i khut hajir ya oo,” da ong u Pyniaid.
Discussion about this post