Jowai: Ka National People’s Party (NPP) ynne da pynman ko ya ka National Executive Committee Meeting ha Constitution Club of India, New Delhi, heiwa da pynlai ya ka yalang da u National President uwa man leh u montri rangbah ka jylla, u Conrad K. Sangma.
Ha kani ka National Executive Meeting da chimbynta da ki heh ka Party na ki jylla waphær waphær deilang wa u symbood montri rangbah ka jylla u Prestone Tyngsong, u montri ka kaam pohyung, u James K. Sangma, u montri rangbah warim ka jylla, u DD Lapang wa kiwi kiwi.
Ha ka yalang da rai wow pyrchah ya ka Citizenship Amendment Bill, 2019 wei kammon u pynkhlan ya ka Party chwa ka Election Council ha jylla Meghalaya, Manipur wa Tripura.
“Ka Party da rai ko wow pyrchah ya ka CAB wei ini ymtoh du i mon ki paidbah ka thaaiñ mihsngi tangwa wot ki rai ki sorkar jylla ka thaaiñ. Sñiawkmen i wa u montri ka kaam pohyung ka sorkar pyrdi wa da khut u ya ki Party wa ki seiñbhalang wow yaklam hajrong kani ka phang tangwa sñiaw i wa dang emkaam hi chiboon ki laad ki luti wow yada ya ki jaitbru khian paaid ka thaaiñ,” da ong u Conrad K. Sangma.
Ha kani ka yalang ki heh na ki sorkar kam ka Arunachal Pradesh, Manipur, Nagaland wa Assam da pynsñiaw ki yei pyrchah ya ka CAB.
Da yaklam leh hajrong kammon wow pynkhlan ya ki chnat ka Party ha ki jylla waphær waphær kam ki seiñ khynroo, wa kiwi kiwi.
Kiwi ki phang wa yaklam toh ka Quarterly Newsletter namo wow pynmih ya ki kaam wa leh ka seiñ chisien le bnai.
Discussion about this post