April 7, 2018
0 Comments
Jowai: Katkam wa yah ka juk katni da mih chiboon ki laad ki rukom wow chna deiwa thymme wei ha kani ka kynti da chna ya u sarok wa jrong 1 km ha chnong Nongkynjeng, West Khasi Hills ya uwa da chna deiwa pynemkaam da ki Plastic wa da lakhit hei yakrehlang ka MGNREGA wa ka Megha-LAMP.
Ya kani ka rukom da sdang da u Rajagopalan Vasudevan, uwa sikai Chemistry ha Madurai, heiwa da pynemkaam da ki plastic wa da ah khian chirup wa i psiang. Ya ini i rukom chna sarok da pynemkaam bha ha jylla Tamilnadu wa Karnataka wei kani toh ka sien wa nyngkong wa pynemkaam ya ini ha ka thaiñ mihsngi.
Advertisement
Katkam ka bui ka World Economic Forum (WEF), ye u pynemkaam da ki plastic yow chna sarok uwa neh slem wa uwa soi hawa kheiñ yei rukom man wei long i bneiñ wa ka rymaw. Kini ki sarok Plastic neh ki kamwa le chah bar ya ki sarok warim wei duna leh i lut hawa chna pynmiat ya ki.
Daw chna sa ar tylli kam kini ki sarok, sa ha chnong Nonglwai I wa II wei da booh thong wow pyndep hawa kut uni u bnai.
U Deputy Commissioner ka West Khasi Hills, u Arunkumar Kembhavi da ong u wa da pynlang hadooh 470 Kg ki Plastic nadooh ki muna, ki khuri, ki yusong baam, ki sdær wa kiwi kiwi neibynta uni u sarok wa 1 km.
Kini ki Plastic ym du kiwa na Nongstoin tangwa da wanrah leh nadooh na Shillong ya kiwa da brait da noh cha madan.
Da ong u leh wa lada ki sarok ha Meghalaya da chna ha ini i rukom daw wanrah ko yei duna i nohroi ya ki plastic cha sarok.
Ya uni u sarok da chna hei lut kamwa T. 33 lak wei da thmu wow man u uwa ryngkat wa ki sarokbah.
