U Nehemayah Tyngkan uwa man u Vice President ka Meghalaya Pradesh Congress Committee (MPCC), da u ong u wa ha ka 22 tarik uni u bnai ki pulit ka Assam da rah ki ya le ngut kiwa chong chnong ka Mukroh cha khloo deiwa pynbaad wa ki toh kiwa khayi dieñ.
Ym du ini, da khana u leh wa ki pulit Assam da yah ki ya kitai ki 3 ngut cha kawi ka khloo heiwa da phah looid sula ki lyngkthuiñ wei da e syndon da u kwai wow baam khaddooh ki, iwa mut wa da thmu bait wow pynyap ya ki.
Hawa klam haka yalang sñiawlem neibynta kiwa da khlaad ha Mukroh wa da pynman ha Congress Bhavan, Shillong, u Nehemayah uwa man leh u kyrtong wow yakhun ya ka Election na Mowkaiaw Constituency, da ong u wa ka chnong Mukroh haap ko hapoh ka West Jaiñtia Hills wei haap ko hapoh ka Elaka Shiliang Myntang.
Da ong u wa ha ka 22 tarik hi, ki pulit Assam da ksoh ki leh ya kawi ka kari Maruti 800 kawa em ki warep hapoh kiwa wan kit kba, heiwa ki pulit Assam da pynbaad ki ya kini leh kam kiwa khayi dieñ pyrchah aiñ.
Da ong u wa i lai toor ki paidbah ym toh wow pynlait ya kitai ki le ngut wa chah rah tangwa neidaw wa boonsien ki manyung da chah ksoh chah rah ki ha ki pulit Assam wei manda pynlait da hap wow lut da ki lak tangka.
