Ka sorkar jylla daw chim ko ya i rai hapoh kini ki ar sngi heiyatoh wa i pynkrehkaam ya ka MHIS wa i eh i khoo wa chem ki paidbah ha ki thaw sumaar khamtam ha ki Hospital samen wow su ya ka bai sumaar.
Ynne ka sngi u Montri ka chnat i chait i khiah ka jylla, u Alexander Laloo Hek da khut yalang u ya ki heh ka chnat ryngkat kiwa pynlai ka MHIS heiwa kammon wow thooh ya ki laad neibynta wow pynboon ya i yarap wow e cha ki paidbah.
U Hek da ong u wa hadien wa chong bichaar, ka chnat dang pyrkhat biang ko ya ki laad ki luti wow e yarap ya ki paidbah deiwa pyrkhat din-pa-din ya ki yukheiñ waroh, heiwa da ong u leh wa neibynta ini daw chimpor sa kamwa 2 sngi, wei hadien ini neiliang ka chnat daw chim ko ya ka rai wa khaddooh heiwa kammon wow e yarap ya ki paidbah ka jylla kiwa chah sumaar ha ka khlam COVID-19.
Katkam wa ong ka Manager ka MHIS, ka Sonata Dkhar da pyntip ko wa em kamwa 866 ngut kiwa chah ktah ha u COVID-19 kiwa em hapoh ki thaw sumaar ki bru samen, wei neibynta kiwa da Test COVID-19 em ki 4099 ngut.
Da pyntip ko leh wa i pynlut wa da sdang katni neibynta wow sumaar ya kiwa chah ktah na u COVID-19 man i T.2.11 klur, katwa i lut neibynta ki Test won man i T. 79.5 lak.
