Shillong: U Kyrmen Shylla uwa man u MLA ka Khliehriat wa heijooh i por u Montri hapoh ka sorkar Meghalaya Democratic Alliance (MDA) da ong u wa i khang tih mooyong da ka NGT nadooh u snem 2014 da wanrah ko yei kylla ha i long i man yong ka bei rymaw ha East Jaiñtia Hills, heiwa da yirngam biang ko wei da khooid ki um ki wah, tangwa ha iwi won i liang da ong u wa ini i chah khang wow tih mooyong da ktah joor wei da wanrah ko ya i yap thngan u paidbah khamtam kitu kiwa chaniah ya ka kamai ja-kpoh na kani ka kaam.
Katkam i ong u MLA wa mihkhmat ya ka thaaiñ wa boon bha u mooyong, nadooh wa khang ya i tih mooyong, kitæ ha kini ki 6 snem, da wanrah yei ktah wa joor ha i liang i yoh i kot, neibhah hadooh 99.9% kiwa chong chnong ka East Jaiñtia Hills toh kiwa chaniah ha i kaam mooyong wow pyndap wei wow psa ya ka yung ka sem.
Da ong u wa ki paidbah ka thaaiñ hanla yachem ki yei eh, ym pu em dooh kyrmen ki neibhah daw wanrah ya ki Policy wa ki aiñ wa u paidbah u ye u wow kreh biang ya ini i kaam.
U Kyrmen da ong u wa u Montri Rangbah da pyrchang u leh ya kiwa emkaam, wei katkum ka yutip wa da yoh yutip wa da ye wow leh yaka Mining Plan, tangwa lada pynkrehkaam da ka Mining Plan i chem chitom ki wakreh mooyong kamwa man kattæ toh wa da syad dor palat, deiwa ong leh wa da i ya krehlang daw ye wow sdang biang ya ki kreh ha itæ i rukom wa ki paidbah u im ki, ka sorkar leh daw yoh ko yaka dan wei ka rymaw leh ym chah ktah ko.
Da pyntip u wa ki bru waroh kiwa chah ktah ym toh du kiwa mylla sngi, wot hadooh ki malik, kiwa yah kari wa kiwa tih mooyong neibhah lada u malik ym ye u pynkreh de ya i kaam, kiwa hapoh yong oo waroh da chah ktah lut wei man ko i dooh yaki hajar ki wakreh hapoh yong ki.
