Ha ki Le Dwar bha wei miat ka Kñia Khang ka Raij Jowai lait noh ha u Mookhai

by Wyrta Staff

June 22, 2017

Reading Time: 3 mins read

Jowai: Ka Kñia ha ki Soo Dwar Soo Luti wa ka Tawiar ka Takan ya kawa da tip kam ka Kñia Khang yong ka Raij Jowai da pyndep ya ka ynne ka 22 tarik.

Ynne dang step da yachem chwa ki khon ka Raij ha Yung Langdoh chwa wow lai kñia cha ki ha ki Soo Dwar Soo Luti wa kynthup ya u Mookhai, u Mooralong, Musniang, wa ha Mooralong kamjooh leh ka Tawiar ka Takan wa tip leh kam ka wah Myntdu. Ya kiwa kñia da bhah ya ki jar jiar yow lai e ngooh e dem ki cha kini ki thaw.

Kani ka Kñia Khang man ko ka kñia yow e ngooh e dem ya ki Soo Dwar Soo Luti wa ya ka Tawiar Takan.

Heijooh i por leh man ko ka kñia wow da wow kær, wow man i khih i khan, yow man bha man miat ya waroh kiwa em hapoh ka Raij Jwai.

Hadien i e ngooh e dem hapoh kini ki soo thaw da lai won cha Madan Ryngkaw, Tpep Pale yow pynkhreh won yei thang i chet.

Da em leh ka yalang yong ki kñi hapoh ka Yungwalieh ka Tpep Pale heiwa da yaklam ya ki kaam niam kaam rukom.

Na Madan Ryngkaw hadien wa da pyndep ya ka Kñia Khang da lai cha Yung Langdoh yow pynap pynsñiaw ya ka Langdoh ka Ri Blai wa ya ki khon ka Raij kiwa emlang ya dak ki chin yong ka Kñia da u Dolloi.

U Dolloi da ong u wa ka Kñia Khang ynne ka sngi man ko kawa miat kawa bha ha ki le Dwar khlem iwon iwon i wit tangwa ha u Mookhai won em i thut kajiak iwa na ki daw ki yong ki bru hi.