U Montri Rangbah ka jylla u Conrad K Sangma hawa wan pait u ya i thaw wow chna yaka Mini Secretariat ha Jowai, da khana u wa ha kini ki tayaw wow wan daw sdang biang u chna yaka Iawmusiang Shopping Complex.
Da ong u wa da em i thut neidaw wa da kylla noh yei thmu wow chna ya kani ka yaw wa da kylla nadooh i rukom pynwan dur hadooh wa i dor, kamtæ ka sorkar India kamjooh ka DoNER da em i sñiawthooh bakla ha ki iwa da wanrah yei sakhut i kaam.
Kamtæ ka sorkar jylla da chim ko yaka rai heipor wa pynman yaka Cabinet ha Jowai wa daw pynlut yaka poisa neibynta kani ka yaw hadooh wa poi i por wa yoh yei pynche naka sorkar India heiyatoh wa i kyrchaan poisa wei lada daw pteiñ wow e poisa wow chna ya kani ka Shopping Complex.
Heiyatoh wa ini, u Conrad da ong u wa da dep wow pynlait poisa T. 70 lak yow sdang biang i kreh i wym slem de, wei da pynryntih da pynsuk yei rukom wan ka poisa naka sorkar jylla wei ini da lai ko chakhmat wei ha kini ki ar tayaw i kreh leh ye wow daw sdang noh i heiwa poisa leh da poi ko cha ka chnat wa toh u pait ya ini.
Da pteiñ u deiwa ong wa sorkar jylla u pteiñ ko wow kyrchaan poisa yow pyndep noh ya kani ka kaam suki suki neibhah kani ka kreh toh kawa heh wei ym toh leh man ko kam chibynta ka mang poisa ka sorkar jylla tangwa kawa toh u wan naka sorkar pyrdi wei daw em hi i chitom poisa tangwa neiliang ka sorkar jylla da em ko ya i rai wow pait ya kani ka kaam hadooh wa ye u pyndep yaka.
