U Montri Rangbah ka jylla, u Conrad K Sangma da ong u wa ha ki kajiak tayaw wa daw wan, daw lum u ya ka Kynhun Montri wow bichaar ya ka bui (Report) wa da ekti da ka High Level Committee (HLC) hajrong ka Them Metor næ ka Sweeper’s Lane kawa em ha Them Ïewmawlong.
Ka High Level Committee kawa da thung yow pait kammon wow kyrriah ya ki bru kiwa sah ha Them Metor næ Sweeper Lane, ynnin ka sngi da ekti ko ya ka Report wa pura cha ka sorkar jylla, wei hadien wa ka HLC da dep ko wow ekti ya kani ka Report, ka sorkar daw chim ko ya ka rai hapoh ka Kynhun Montri namo ka Cabinet.
U Montri Rangbah da ong u wa hachwa wow rah ya katai ka Report hapoh ka Cabinet, neiliang ka Political Department daw puræ bniah bha ko ya katai ka Report, wei hadien itæ daw phah ya ka HLC wow wanrah ya ka hapoh ka yalang yong ka Cabinet, hadien wa da dep wow bichaar hapoh ka Cabinet ka sorkar daw chim ko ya i rai wa kammon wow lai chakhmat.
Ha i jooh i por u Montri Rangbah da e khublei ya ya ka HLC hapoh i yahkhmat u Symbood Montri Rangbah, u Prestone Tynsong wa ya ki dkhot kiwa da kreh chitom yow ye u pynbiang ya katai ka Report.
Kam wow kdaw, ka yakhih ya ka Them Metor da khai biang ko ha ka 31 tarik Naisan 2018 kawa da ktah leh ya i suk i saaiñ ha waroh kawi ka jylla, wei hadien ini neiliang ka sorkar da chna ko da ka High Level Committee wow thooh ya ki laad neibynta wow pyndooh yei eh na katai ka thaw, khamtam hadien wa da mih i dawa wa toh u kyrriah noh ya ki bru kiwa sah ha katai ka thaw.
