15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Ha kyndian synrang chong ka mynried kiwa lai puræ MBBS na ka jylla Meghalaya

0 Comments
Advertisement ad1
Advertisement ad1

Shillong: Ki 10 ngut kiwa yoh ya ka NEC Quota wow lai puræ MBBS (Doctor) na Meghalaya ha ki Medical College ka Assam da pyntip ki wa da chah pyndam lut ki Quota yong ki, ya kawa da phah lyngba ka NEC wei da jied u Under Secretary, Health and Family Welfare Department.

Hawa yachem ki wa ki kiwa pathai khubor ynne ka sngi da ong ki wa da chim ki da ka rai wow e mukotduma ya ka sorkar Meghalaya yeini wa jia ya ki wei daw pynman ki leh da ka chah thngan wa khlem booh por hajan Secretariat.

Da pyntip ki leh wa ka sorkar jylla hap smat ko u leh yeiwa emkaam neibhah ka Supreme Court da e por ko hadooh ka 7 tarik wow pyndep ya ki admission heiwa ha kiwa boon ki jylla da kut ka admission.

Ka Kanishtha Hajong toh kawa da yoh thaw puræ ha Silchar Medical College wei manda poi ko heini da pyntip wa da chah pyndam ka Quota yong ka.

Hadien ini ha ka 31 tarik u bnai wa da dep da pynyoo ko ya ki ya ka chithi na ka sorkar pyrdi heiwa ym em i pyrtuid yong ki ha ka NEC Quota.

Ka Natasha Boro toh kawa da yoh u lai puræ ha Guwahati Medical College (GMC) da pyntip ko wa ya ka leh da jia i jooh hi heiwa ym em chah ya ka u psiah ko ha kani ka thaw puræ ha ka 25 tarik uni u bnai wa da dep.

U Evergreen Khnongjoh uwa man uwi na kiwa poi cha khmat na ri-loom Khasi wa Jaiñtia da ong u wa ka bei wa u pa yong oo toh ki warep wei da nohlut ki wow wailaad u lai puræ tangwa ini i leh ka sorkar da pyndooh mynsien ko ya ki waroh.

U Jeremiah D. Sangma won da ong u wa heipor wa mut u wow lai chim admission ha Guwahati Medical College da pyntip ya oo wa ym ye u e thaw puræ ya oo neidaw wa em ka mukotduma ha ka Assam High Court.

Da ong u wa da pyntip cha ka sorkar Meghalaya tangwa ym ye ki u e jubab da iwa biang. Wei ini waroh toh du neidaw wa ym biang i kreh kini ki ar tylli ki jylla.

U Iaisanbha A. Khyllep won da ong u wa da dep soi u ya ka bond wa ka sorkar Meghalaya tangwa hadien wa tip u yeiwa jia ya ka Natasha Boro da lai thooh yutip u yeini heiwa da yoh u ya ka kot kawa ya soi ka Meghalaya wa Assam ha u snem 1976 yow rah u ya kani ka kot wei wow pynyoo cha ki Principal kiwa kyntait ya ka.

Ha ka 03.07.17 u Director of Medical Education, Assam Prof (Dr) AK Barman da phah u ya ka chithi neiliang ka sorkar Assam cha waroh ki Principal ka Guwahati Medical College, Guwahati, Assam Medical College, Dibugarh wa Silchar Medical College, Silchar wa ki 13 tylli ki thaw puræ MBBS wa da booh na ka NEC wa da pyndam ya ki wei da pynhiar na ka 15 cha 6 tylli ki Seat heiwa da pyndam noh ya ka bhah yong ka NEC.

Share this:
Previous

Ujor u HDR Lyngdoh pyrchah ya u Banhum Mylliem wa daisarom u ya oo

Next

Ym duna ya 7 MLA ka Congress ki wow psiah noh cha ka NPP: Dr WR Kharlukhi