Ynne ka sngi u Montri ka sorkar jylla uwa man leh u MLA ka Khliehriat, u Kyrmen Shylla hawa e yei klam ha ka yalang wa tbian wow wai ya ka madan East Jaiñtia District Sports Association (EJDSA) Artificial Grass Football Ground ha Dienchynrum, East Jaiñtia Hills, da kynmoo u ya ki por wa dang khlan u pa yong oo, u Kor Sympli uwa jooh yalehbol, wei mutdur u wow ye u riñ biang yei por chadien khnang wow ye u pa yong oo u yoh u wow yalehke ha kani ka madan.
Da ong u wa ha i lai luti ki waheh da em chiboon i e yarap ki neibynta kani ka madan tangwa da e khublei u ya ki waroh kiwa embynta wow kreh neibynta ki khon ka District waroh kawi neibhah wa da em ki khloor yalehke kiwa da embynta ha ki lympung yalehke waphær waphær ha ka ri.
Chooh chooh da pynchlur u ya ki manbei manpa wow kyrchaan ya ki khon yong ki wow yalehke Sports waphær waphær.
Da e khublei u leh ya u DC ka District wa kiwi kiwi kiwa da kreh wow pynman ya kani ka madan kamwa man ko ynne ka sngi hanla dang em ki kaam wa sahteiñ leh.
Da kyntu u leh ya ki EJDSA wow pdiang ya ki chnong tang chisien chi tayaaw wow lehke ha kani ka madan dei makna heiwa oo u bahkhlieh u ya ka bai pynneh (Maintenance) ya ka madan wa ka bai Refree ym du neibynta ka Khliehriat Constituency tangwa neibynta ka District hi waroh kawi.
U Kyrmen da kyntu u leh ya kiwa yalehbol wow chim ki ya kani ka madan kam ka yong ki hi neibhah wa man ko kawa nyngkong dooh kam kani kawa miat dooh hapoh ka District wa ka jylla hi waroh kawi.
Heijooh i por u Kyrmen da kular u leh wa lada chah jied biang u kam u MLA na ka thaaiñ u pynmih ya kam kani ka Artificial Turf man ka san snem hapoh ka Constituency.
Ha kani ka sngi u Kyrmen da kyrpaad u leh ya ki paidbah wow e buit ki ya oo wei wow krehlang chirup yow pynmiat pynbha ya ka Constituency wa ka District hi waroh kawi kawa emkaam chiboon i yarap wow pynmiat ya iwa da kyrkhu u Blai nadooh ki loom ki wah, ki kchaaid, ki krem wa kiwi kiwi khnang wa daw poi daw tooid kiwa uiñke suwari cha kani ka thaaiñ neibhah ki khon khynroo kiwa ymye wow yoh khih sorkar daw poi ka pali wow ye u pyndap yeiwa emkaam ha yung ha sem lyngba i kaam uiñke suwari.
