U MLA ka UDP uwa man leh u Montri ha ka sorkar MDA wa yahkhmat da ka NPP, u Lahkmen Rymbui da ong u wa katkam ka Result MDC kawa da pynbna ynnin ka sngi, da che kdar wa kiwa chong chnong ka Ri-loom Garo dang bood bait ki ya kiwa yahkhmat ym toh kam ki paidbah ha Khasi-Jaiñtia.
Da ong u wa katkam ka Election MDC, ki paidbah ha Ri-loom Garo jied bait ki ya ki National Party, wei neitæ i daw kiwa yahkhmat kam u (T) Purno Agitok Sangma ym em lai u cha ki seiñ Ri-loom wei da sdang u da ka yong oo hi ka seiñ saiñpyrthai ka wymtoh ka seiñ Ri-loom.
U Lahkmen da ong u wa kiwa yahkhmat ha Ri-loom Garo da sñiawthooh ki wa uwa mihkhmat toh u man bait u uwa na ka National Party.
Chooh chooh da ong u wa ha Ri-loom Khasi-Jaiñtia lait na u Hopingstone Lyngdoh kiwa yahkhmat duna bha kiwa ye wow sai ya ki kyrtong ki wow jop ha ki Election.
U Lahkmen Rymbui da ong u wa ka Result MDC ha Garo Hills da pynyoo che ko wa ka Congress ym ye ko wow noh næ kyntait ya u Dr. Mukul Sangma neibhah wa em u ya i bor. Hawa yatoh wa i chah rem ka NPP ha ka Constituency yong u Montri Rangbah, neiliang u MLA ka UDP da kyntait u wow ong iyi iyi leh.
