Ki ar tylli ki mrad khloo kiwa tip kam ki Ring-Tailed Lemur ki wym em im hapoh India kiwa da chah tooh na Gazipur Safari Park, Bangladesh ha u March 2025, da chem ya ki ha Vantara kawa man ka Wildlife Conservation and Rehabilitation Centre ha Gujarat kawa mantre da u Anant Ambani, u khon u Mukesh Ambani.
Neiliang ki bor ka Bangladesh da paan yarap ki na ka Interpol wow pynuiñ ya kini ki mrad.
Ini wan i hadien wa ka Criminal Investigation Department (CID) ka Bangladesh da booddien ko yei chah tooh kini ki mrad na ka Safari Park.
Ya kini ki mrad da tooh hei step ka 23 tarik u March 2025 wei da khayi tooh ya ki cha Darshana ha Chuadanga neitæ cha Vantara wa em ha Jamnagar ka jylla Gujarat.
Ki CID da chemdien ki ya kini ki mrad hadien wa mih ki dur yong ki ha Social Media wa booh da ka Vantara hi.
Kini ki jait mrad toh kiwa chem du ha Madagascar donhi wei man ki leh kiwa em hei maa wow dooh jait.
Katkam wa takit ka CID hadien wa chah tooh kini ki mrad da em ar ngut ki bru uwi na Kolkata uwa tip kam u Bablu wa uwi uwa na Mumbai uwa tip kam u Shiplu kiwa da wan cha Bangladesh ha u May 2025 yow thied ya kini ki mrad heiwa da dai ya uwa da heh hei dor wa Rs. 13 lak katwa uwa dang khian hei dor wa Rs. 2.32 lak heiwa da pynbait yeini da kiwa na Bangladesh kiwa tip kam u Delwar wa u Tapan.
Manda poi kini ki mrad cha India da dai biang ki hei dor wa Rs. 48 lak cha kawi ka seiñ kawa emyatoh wa ka Vantara.
Kam wow kdaw heini wa ka Vantara toh kawa heh hadooh 3,500 Acre kawa ri ya ki mrad wym em wa pait, kiwa mynsoo wa kiwa emkaam yarap wei da wan wai ka da u PM Narendra Modi ha u March 2025.
Discussion about this post