Shillong: I pynkhreh wow jied ya kiwa mihkhmat cha ka yung dorbar Lok Sabha ka wow man ha u snem wow wan da man ko kawa lai chaaid chaaid ha waroh kawi ka ri India, tangwa ha Meghalaya i kwah kyrtong wa monlang da pynthut ko ya i pynkhreh neibynta kani ka Election.
Hawa yaklam wa u heh ka BJP ha ka jylla uwa man leh u montri sorkar, u Alexander Laloo Hek ynne ka sngi da ong u wa lada ka Bharatiya Janata Party (BJP) dang kwah ko wow synchaar ha India toh u booh kyrtong ko ha waroh ar tylli ki Parliamentary Constituency ha ka jylla, wa kynthup ya ka Shillong wa Tura.
Heiyatoh wa i kwah ka UDP wow em u kyrtong monlang ka sorkar MDA, u Hek da ong u wa u kyrtong monlang toh uwa da jied wei mynjur lang da waroh kiwa em ha ka MDA.
“Hei yoo yong nga ha Tura ye u yoh na ka NPP, tangwa ha Shillong ympu yoh, wei ymye u pynbor da kawon kawon ka party wei lada em, toh u man u wym em wa kawon kawon ka party.”
Da klam skem u wa ka BJP daw wan biang ko heibor ha Delhi wei ka party toh u booh ko ya u kyrtong ha waroh ar tylli ki Constituency ka jylla khnang wa uwi naki u yakhun u kam u montri ka sorkar pyrdi.
Heiyatoh wa i thmu ka UDP wow pynyakhun kam u kyrtong monlang, neiliang u Hek da ong u wa em hi i hok wow pynyieñ kyrtong kam ki seiñ saiñ hima.
Hawa jubab lada em namo ym em i ktah ya ka sorkar MDA deiwa leh kamni, neiliang u Hek da ong u wa ym em yaphær.
“Ha ka election chiteiñ samoi ha Ranikor da sakhi, wa kwah i ya u kyrtong monlang, ki party kiwa em ha ka sorkar kam ka PDF wa UDP da pynyieñ ki jar jiar ki kyrtong wow yakhun pyrchah, tangwa ympu em iwon iwon i ktah ya ka sorkar synrop MDA,” da ong u hek.
Discussion about this post