U President ka NPP Meghalaya, u Prestone Tynsong ynne ka sngi da ong u i wym sai ya u kyrtong wa ya monlang cha ka Election MP Lok Sabha ha uni u snem toh neidaw wym em iwon iwon i ya kdoh ktien hapyrdi ki seiñ kiwa emlang hapoh ka sorkar MDA-II.
Da ong u wa heipor wa chna ya ka sorkar MDA wa nyngkong ha u snem 2018, heipor wa dang em u (T) Dr. Donkupar Roy kam u President ka UDP, da em i ya sñiawthooh wei da ya mynjur wa haka Election 2019, ka NPP u kyrchaan ko ya u kyrtong MP ka UDP kam u kyrtong wa ya monlang. Tangwa heipor wa wa chna ya ka sorkar wa katni hadien ka Election 2023 won ym em i yaklam waka UDP wei na ini i daw, ka NPP da rai ko wow sai ya u kyrtong yong ka hi ha kani ka Election MP wa daw wan.
Kam wow pynkynmoo wa u kyrtong ka UDP haka Election MP ha u snem 2019, u Dr. Jemino Mawthoh da rem u deiwa tam chi lak Vote ha u kyrtong ka Congress, u Vincent H Pala. Wei ini wa jia ha u 2019 da pynyoo wa ki paidbah ym bien ki wow pynjop ya u kyrtong monlang ka NPP wa UDP neibhah lada toh wa kiwa kyrchaan ka NPP waka UDP u ya krehlang ki, da toh u jop suk yaka Election.
Ha kani ka sorkar MDA-II leh ka UDP da ya emlang ko hapoh i yahkhmat ka NPP najrong kiwi ki Party kiwa emlang ha ka MDA-I ha u snem 2018, tangwa ka UDP leh da lai ko chakhmat wow sai kyrtong neibynta ka Election MP.
Discussion about this post