Shillong: U montri rangbah ka jylla, u Conrad K Sangma da kular u hakhmat kiwa sikai Adhoc wa ha u Kmaichonglad (Dec) uni u snem ka sorkar daw khut yaklam ko hajrong i eh i khoo yong kiwa sikai Adhoc khamtam neibynta wow pynku ya ka kaam sikai Adhoc cha ka Deficit, kawa man ka dawa wa hakhmat dooh yong kiwa sikai.
Ya ini u Conrad da ong u hawa klam ha ka yalang paidbah kiwa sikai Adhoc ka jylla kawa da emlang leh kiwa sikai GVK EMRI, Meghalaya wei kamjooh ki wakreh ka Mid-Day Meal, heiwa da kular u leh wa ka sorkar daw chimkhia ko ya iwa eh wa kini ki wakreh yachem ki.
Ha kani ka yalang wa da khut pynman da ka All Meghalaya Adhoc Teacher’s Association ha madan Malki, Shillong da emlang leh u montri khynnah ka sorkar pyrdi uwa pait yaka ka Social Justice and Empowerment, u Ramdas Athawale uwa da kular wow chimkhia wow yaklam wa ka sorkar pyrdi hajrong i eh wa yachem kiwa sikai Adhoc ha kani ka jylla.
Hawa yatoh wa i eh wa yachem ki wakreh ka EMRI hapoh ka lama yong ka Meghalaya EMRI Worker’s Union (MEMRIWU) da ong u wa ka sorkar dang thooh laad thooh luti ko neibynta yong ki leh. Da e burom u leh ya i chakri wa ki wakreh ka EMRI da e ki cha ki paidbah, wei da pyntip u leh wa u montri ka chait ka khiah yong ka sorkar da yaklam u ya ini waroh yow pynmankaam ya i dawa yong kani ka seiñ.
Ha iwa tawon i liang u Conrad da pynsñiaw u yei eh wa ka jylla da yachem ko hakhmat u montri khynnah ka sorkar pyrdi, neidaw wa duna i pynmih poisa na ka jylla kawa pynman ya ka sorkar wow chem chitom wow pynmankaam ya i dawa kani ka seiñ.
Da pyntip u wa ka sorkar jylla da chaniah bait ko ya i yarap poisa na ka sorkar pyrdi hadooh katni hadooh 85% katwa ka jylla i yoh ko man du kamwa 15%.
Hawa klam ha kani ka sngi neiliang u Ramdas Athawale da kular u wow rah ya ini i eh yong kiwa sikai cha ka Ministry of Human Resource Development (MHRD) wei da pynsñiaw u leh wa khlem kiwa sikai ym em ka puræ puthi wei khlem ka puræ puthi ym ye u pynman yaka ri kawa paka.
Ha i jooh i por u Athawale da e u ya ka yaroh leh ya ka sorkar jylla hapoh i yahkhmat u Conrad K Sangma wei da kular u leh wow yaklam wa ka sorkar neidaw wa kwah u wow pyndooh noh ya ini eh kiwa sikai.
Ha kani ka sngi neiliang u Convener ka All Meghalaya Adhoc Teacher’s Association, u Kenneth Shadap da e u leh yaka dorkhat pynkynmoo ya ki dawa kani ka seiñ kiwa sikai skur Adhoc wa da booh ki hakhmat ka sorkar.
Neiliang u Convener ka AMATA da pynsñiaw u yei kyrmen hakhmat u Athawale wa hapoh ka chisnem ka sorkar daw pynku noh ko ya kamwa 5000 ngut kiwa sikai Adhoc cha ki Deficit. Da ong u wa ha jylla Assam du hapoh 5 snem da ye wow pynkylla hadooh chi lak ngut kiwa sikai Adhoc cha ka Deficit wei da yooluti u wa ka sorkar pyrdi daw leh ko ya ini i jooh neibynta kiwa sikai ka jylla Meghalaya.
Katkam wa pyntip u Shadap, ki skur Adhoc ha kani ka jylla wa kynthup nadooh ki Lower Primary hadooh ki Higher Secondary da em ki hadooh 1857 tylli, katwa kiwa sikai won da em ki hadooh 7082 ngut.
Discussion about this post