U Montri Rangbah ka jylla, u Conrad Sangma ynne da lai pait u ya ka thaw sumaar Cancer namo ka Cancer Wing wa em ha Shillong Civil Hospital kawa ini wadep da pynman kam ka Covid Ward heipor wa joor ka khlam.
Da pyntip u wa da boon kiwa daw hap u pynkylla wei da kmen u wow yoo ya chiboon iwa da dep pynchna wei yooluti wa i chna (Civil Work) daw ye u pyndep ha ka tayaw wa nyngkong u Kmaichonglad (Dec) uni u snem.
Heiyatoh wow wanrah ya ki kor wa kiwi ki tiar wa thymme, da pyntip u wa daw chimpor i neidaw wa yeini daw hap leh da iwi tawon i rukom tangwa kattæ chooh ki thaw wow thiah (Ward) ki kynthai wa chynrang wa kiwi ki Ward ym slem da hoi wow pynemkaam.
Chooh chooh da pyntip u wa ki kor warim kiwa da em katni daw pteiñ u pynemkaam kat wym pu yoh ya ki tiar wa thymme wei daw ye noh u pynkrehkaam pura ya kani ka Cancer Wing ha ka tayaw wa nyngkong lane ka tayaw war u Kmaichonglad.
Ynne hi ka jooh ka sngi, u Conrad da lai pait u leh yei kreh yong ka Shillong Government College of Engineering wei da yooluti u leh wa ya kani daw ye wow wai noh ym slem de.
