U Montri Rangbah ka jylla, u Conrad Kongal Sangma da kyntu u ya u Montri wa pait ya ka chnat puræ puthi ka sorkar India, u Dharmendra Pradhan neibynta wow yoh yei tipmit noh yei ktien Khasi wa Garo hapoh ka Eight Schedule yong ka riti synchaar ka ri.
U Conrad da pynsñiaw u yeini i emkaam yong ka jylla hakhmat u Montri ka sorkar pyrdi ynne ka sngi ha ka yalang wow wai ya ka Central Institute of Hindi, Shillong Centre ha Mawdiangdiang.
Hawa klam cha ki laad pathai khubor, u Montri Rangbah da pyntip u wa u Montri ka chnat puræ puthi yong ka sorkar India, u Dharmendra Pradhan da pynsñiaw u waroh ki jait ktien toh kiwa emkaam hapoh ka ri India, wei katwa ye ka sorkar India daw leh ko wow kyntu ya ki ktien waphær waphær.
U Conrad da ong u wa u Pradhan da klam che u wa ki ktien wa klam ha ka thaaiñ mihsngi toh kiwa emkaam wow kyntu kyrpang, tangwa wow pynpsiah hapoh ka Eight Schedule toh kawa em ki yong ka ki bynta, neibhah wa em palat 40 tylli ki jait ktien kiwa em ha ka luti wow yoh yei tipmit ha ri India.
Da ong wa i dawa wow pynpsiah ya i ktien Khasi wa Garo hapoh ka Eight Schedule toh iwa da slem, heiwa ha ka Yung Dorbar chna aiñ yong ka jylla da dep wow mynjur yei rai lang namo ka Resolution, wei katni ka sorkar ka dang booddien ko ya ini i kaam.
U Conrad da pyntip u wa u Pradhan da kular u wow kyrchaan ya ka jylla hawa yatoh wow kyntu yei ktien i thylliej. Da pyntip u wa da dep wow e yumut wow kyntu ya ki ktien wa klam deiwa pynemkaam ya i stat ka juk wa katni yow pynpsiah ya ki ktien tynre ha ki ‘Mobile App’.
