Ka KSU ynne da lai booh FIR ko ha u Superintendent of Police ka East Jaiñtia Hills District heiyatoh wa iwa jia ha ka 7 tarik uni u bnai hadien wa ki dkhot ka seiñ hei yahkhmat u President wa u General Secretary deilang kiwi de ki dkhot da lai ki cha ka chnong Shnongrim wa Daistong yow pynyoo yei kyrchaan ya kiwa pyrchah ya ki bru kiwa da thmu wow knieh yabor yei thaw yong ki.
Ha ka FIR da ong wa hadien wa kut i yachem wei da mut wow liwan deiwa lai lyngba i thaw wa em ka karkhana ka Shree Cement heipor kamwa 3:30 i sngi, da em ki damok kiwa em kamwa 8-10 ngut kiwa rah wait, rah nar rod wa ki moo kiwa da pynsangeh ya ki kari kiwa na Shnongrim kiwa da wanlang cha ka yalang ha Daistong kamjooh ki kari ki dkhot ka seiñ wei ya kini ki damok da yahkhmat da u Miki Sukhlain wa u Khreh Sukhlain wa kiwi de kiwa emlang wa ki.
Ka seiñ da ong ko wa i daw wa khangluti toh wym kwah ki ya ki dkhot ka seiñ wow yoo wa krehkaam ka karkhana wot hawa ka sorkar Meghalaya da phah ko wow sangeh yei kreh.
Ha ka FIR da ong wa kini ki bru nynkong da pynsangeh ki ya ka kari kiwa na chnong Shnongrim heiwa da em leh ki kynthai hapoh deiwa maham wow pynyap ki lada lai luti ki na kani ka thaw wei lada pyrchah ki ya kani ka karkhana.
Manda poi won ki dkhot ka seiñ hawa pyrchang wow yaklam pynsuk da chah pynkhor pathan heiwa uwi na kini ki da mut u wow pam da ka wait ya ki dkhot ka seiñ tangwa ym em wa toh wei deiwa boon paaid da ye ki wow knieh ya kani ka wait wei wow beh ki.
Hawa yut ki leh da pynkhor ki ya ka seiñ deiwa ong wa ki pulit toh kiwa em wa ki wow pynsangeh ki wei manda lai chakhmat da em ki pulit kiwa em ha kani ka thaw heiwa da khana ya ki yeiwa jia tangwa ym em leh ki iyi iyi ya kini ki bru wa rah wait.
Kamtæ da kyntu ya u SP wow leh u yeiwa emkaam katkam ka aiñ.
Discussion about this post