Shillong: U montri ka tnat pynlai Transport, u Sniawbhalang Dhar da pyntip u ha yung dorbar wa ka sorkar da booh thong ko wow pyndep noh ya ka thaw yieñ bus næ ka Inter State Bus Terminus kawa ha Mawlai Mawiong, Shillong, ha u Wisu (March) yong u snem wow wan, wei yeini da jubab u yeiwa kylli u MLA ka Congress na Mawlai, u Process T Sawkmie ynne ka sngi.
U Sniawbhalang da ong u wa kini ki thaw yieñ bus da mynjur nadooh u snem 2013 wei da mang wow pynlut T.48.31 klur da ka tnat Development of North Eastern Region (DoNER) lyngba ka North Eastern Council (NEC) ha i thaw wa heh kamwa 53,000 sq ft tam.
Da ong u wa hei sakhiat ka NEC da booh thong ko wow pyndep ha u Naichiphaw (Oct) 2017 tangwa ym ye wow pyndep neibhah wa chimpor wow pyndep ya ka Detailed Project Report (DPR) wei ini man i katkam ka bui na u Chief Engineer ka Public Works Department (Roads) ka jylla ha ka 4 Naikhynde (Aug) 2014.
Hadooh katni da pynlait poisa la soo sien iwa kynjooh hadooh T. 23.27 klur.
Da pynrap u leh deiwa ong wa da slem i kreh hadien wa em i kynreh ya ki kot ki sla kiwa khih mylla kiwa na baar jylla, wei iwi tawon i daw toh wa slem ka NEC wow pynlait poisa wa i wym che i rukom draw dur wow chna ya kani ka thaw wei da haap phah batai biang ha ka company wa dro ya ini i dur.
Iwi tawon indaw wa slem toh wa chimpor wow chim thaw wow chna ya ka khyrdop wow psiah u mih cha kani ka thaw yeiwa da chimkhia bha ka sorkar.
Neiliang u Contractor wa chna ya kani ka thaw da paan por chooh chooh u na ka sorkar wow pyndep hadooh u Wisu (March) 2019.
Discussion about this post