Hadien wa da mih biang ki kyntien wow dawa pynkrehkaam ya ka ILP hapoh jylla, neiliang u Montri Rangbah ka jylla, u Conrad K Sangma ryngkat wa u Symbood Montri Rangbah, u Prestone Tynsong ha uni u bnai daw lai biang ki cha nongbah New Delhi wow yaklam wa ka sorkar pyrdi hajrong kiwa boon ki kaam wa sahteiñ hapoh ka jylla, wa kynthup leh ya ka ILP Resolution wa da mynjur da ka Yung Dorbar ki MLA.
Ye wow kdaw heini wa ka dorbar chna aiñ ka jylla da pdiang ko ya ka Resolution wow pynkrehkaam noh ya ka Inner Line Permit hapoh ka jylla ha u Kmaichonglad u snem wa dadep hadien i dawa ki seiñbhalang wa ki seiñ waphær waphær hadien wa pynman aiñ ka sorkar India ya ka Citizenship Amendment Act (CAA).
U Prestone Tynsong da ong u ynne wa deiwa pynrap leh wa ha u bnai wa dadep da pyrchang wow yachem ya u Montri ki kaam pohyung ka ri India, u Amit Shah ha Delhi, tangwa ym em u yohlaad wow yachem neidaw wa boonkaam u.
Da kyrmen u leh wa ha uni u bnai ka sorkar daw lai biang ko cha Delhi wow yaklam hajrong ki phang kiwa yatoh wa ka jylla.
