U Deputy Chief Minister uwa pait leh ya ka chnat Urban Affairs, u Sniawbhalang Dhar, ynne da pyntip u wa ka Shillong Business cum Tourism and Cultural Centre wa da chna ha MTC Depot ha Khyndailad toh 86% dadep i kreh wei u wai ya ka ha u Naiynru 2026.
Da khana u wa ya kani ka Project da pyrkhat ha u 2021 wow pynemkaam ya i thaw wa 1.76 Acre wow booh ya ki Office, Conference Hall, Restaurant, ki dukan dukdoh wa kiwi.
Ka Cabinet da rai ko wow pynlait Rs. 216.347 klur neibynta kani, heiwa ka HUDCO da kular ko wow e ram Rs. 154.213 klur, Rs. 45 klur na ka Shillong Smart City Project wa Rs.17.13 klur na ka sorkar jylla.
U Sniawbhalang da pynche u wa ya ka Loan da rai won cha ka Rs. 115.66 klur, heiwa da chah pyrtuid da ka sorkar Meghalaya.
Da khana u leh wa ym em sangeh wow su ya ka ram heiwa kat ha u November 2025, ka poisa wa sah man ko Rs. 1,08,58,00,955, deiwa pynrap wa kani ka ram tobh neibynta 12 snem wei u kut ko ha u 2036.
Ha ka 10 tarik u February 2023, da soi ya ka soskular hapyrdi ka sorkar jylla, MTC, MUDA wa Shillong Smart City Ltd wow pynemkaam ya kani ka yung.
I kreh wa dadep man i 85%, heiwa Rs. 198.52 klur da su cha u Contractor.
Kani ka Centre u man ko ki ar tylli ki yung wa 6 mala wa i thaw waroh wa heh 19,057.68 sqm neibynta ka Parking ya ki 196 tylli ki kari, wa 3,756.1 sqm i thaw madan (Open Space).
Da khana u wa ka East Wing toh u e wai ya ki yung krehkaam sorkar, katwa kawa sah won cha ka MTC.
Chooh chooh da ong u wa ki 60 ngut kiwa jooh chongwai ha MTC Complex da booh bhah ya ki ha ka yung wa thymme.
Discussion about this post