Ki MLA yong ka Congress daw lai rah ki ya ka phang yakhih ka synjuk Meghalaya Government LP School Contractual Association kiwa em hapyrdi i chah thngan katni ha Madan Malki, hapoh ka yung dorbar chna aiñ ka jylla kawa da sdang nadooh ynne ka sngi Thohdieñ.
Ini i rai da ki MLA ka Congress da wan hadien wa ynne ka sngi manda wai ka sngi wa nyngkong ka yachong dorbar, da lai ki cha Madan Malki, i thaw wa kiwa sikai da chah thngan ki yow yachem wei wow ya syllok markhmat wa ki.
Ki MLA ka Congress kiwa da lai wow yachem wa kiwa sikai Contract kiwa ka sorkar da pyndooh wei pyndam noh ya i kaam yong, da emlang u HM Shangpliang, u George B Lyngdoh, u Mohendro Rapsang, u PT Sawkmie wa u Kimfa Sydney Marbaniang.
Hawa klam wa ki laad pathai khubor, u HM Shangpliang da ong u wa hadien ini i yachem ya kiwa sikai, da dap sakhiat ki da i mynsien wa sñiawkhia, wei haka 8 tarik kam kiwa mihkhmat daw rah ki ya kani ka phang wow yaklam hapoh ka yung dorbar, deiwa daw kyntu ya ka sorkar jylla wa ki toh u thung biang ya i kaam kini kiwa sikai.
U Shangpliang da booh u leh ya u dak kylli ya ka sorkar wei itæ toh wa hawa pyndam kaam noh ya kini kiwa sikai toh neidaw wym biang ki kam kiwa sikai, wei ileh won nadooh wa sdang da thung kreh ya ki.
Najrong itæ wa lada ini i kaam toh heitæ i dur yong ka Contract, ileh won ka sorkar e por ko ya ki wow kreh ki aw jan hadooh 10 snem, iwa katkam i kyndon i thung kaam Contract ka samoi krehkaam toh u man ko 6-7 bnai lane iwa pynyinsur leh chi snem, wei hawa pynyinsur won chi snem, kini kiwa sikai kattæ em ki yei hok wow lai cha ka yung bichaar.
U George B Lyngdoh, da ong u wa neiliang ka sorkar toh u e ko yei jubab wa che hajrong ini i rai yong ka, neibhah ini rai wow pyndam noh ya i kaam da wanrah yei eh wa khroo ya ka manyung mansem yong kini kiwa sikai, kiwa boon na ki toh kiwa da sikai da boon tylli ki snem wei najrong ini, i rta leh kattæ da heh.
