Ampati: U montri ka tnat Sports & Youth Affairs, u Zenith Sangma ynne da wai paidbah u ya ka Rangsakona Invitational Football Tournament 2017 ha ka yalang wa pynman ha Rangsakona Govt Higher Secondary School Playground, South West Garo Hills hei emlang u Chairman ka GHADC, u Sadhiarani Sangma, u Chief Executive Member, Boston Marak, Deputy Commissioner, C.V.D. Diengdoh, Director, Sports & Youth Affairs, Matsiewdor War-Nongbri, wa kiwi kiwi.
Hawa e i klam ha kani ka sngi hadien 10 snem wa da pynman biang ya kani ka Tournament, da ong u Zenith wa kani ka lympung daw wai laad ko ya ki dhab wa kiwa yalehke na kylleiñ ka ri-loom Garo wow pynyoo ki yei sap yong ki ha kani ka yalehke neibhah wa ki dhab wa psiah ye ki u yaleh pyrchah ya ki dhab wa da naam kam ka Navajyoti Club, Guwahati, Langsning Sports Club, Shillong, United FC, Goalpara Assam wa ka Shillong Lajong Juniors FC.
Da klam u leh chaphang ka Mission Football ya kawa da sdang hapoh ka jylla ha kini ki bnai wa dadep heiwa daw booh ya ki thaw sikai wow pynpliah ki ya ki kaam yalehke nadooh dang khian ki khynnah wei ka Rangsakona toh kawi na ki thaw wow em kam kani ka thaw sikai. Da pyntip u leh wa daw jied ya ki khynnah nadooh dang khian ki chynrang wa kynthai kiwa em sap ha kani ka yalehke.
Ka Matsiewdor War-Nongbri da ong ko wa ka tnat yong ka yaleh ko u thooh ki laad wa ki luti wow kyntu kynrong ya ki kaam yalehke deiwa yarap ya kam kini ki lympung, katwa u CVD Diengdoh, uwa man leh kam u Chairman ka Organizing Committee, da ong u wa ka sorkar yaleh ko u thooh ki laad hei wow kyntu kynrong ya ka kaam yalehke sports yong ki khynnah nadooh wa dang khian ki.
Waroh da poi hadooh 12 tylli ki dhab kiwa wan yachimbynta ha kani ka lympung na kylleiñ ka ri-loom Garo wei ka yalehke wa nyngkong dooh da man hapyrdi ka Rangsakona FC wa ka Druma Sandruma FC na Tura.
Discussion about this post