Jowai: Kiwa yahkhmat ka party UDP napoh ka ri-loom Jaiñtia hapoh i yahkhmat u General Secretary, u Kitbok Nongtdu wa u Kynsai Bareh uwa man kam u President Youth Wing chirup kiwi kiwa kyrchaan ka party, ynne ka 22 tarik da hiar ki cha ka 1-Nartiang LA Constituency wow pynkhai im biang ya ka Party kawa da wiar da boon snem kattu nadooh u 2003, ha ka yalang wa pynlai da u R. Thubru chirup i emlang ki paaid ka thaaiñ kawa pynman ynne ha chnong Namdong.
Neiliang u Kitbok da khana u wa i daw wa pynman wow pynkhai im biang ya kani ka Party toh hadien wa yoo wa ki bru kani ka thaaiñ sdang biang ki wow kyruiñ, u maya ya ka UDP, wei iwa kongsan toh hadien wa em leh ki kyrtong na kani ka thaaiñ wa paan tiket neibynta u yakhun ya ka Election MDC 2019.
Ha kani ka yalang da jied chwa ya ki arngut ki Convener wa kynthup ya u Phrang Dkhar wa u Dawan Lyngdoh ki wow phrat luti wow pynlum pynlang ya ki paaid ka thaaiñ chwa wow khut biang ya ka dorbar wa rap heh neibynta u thung won ya kiwa krehkaam wa pura ka Party kamjooh u wai ya ki yung krehkaam.
Neiliang u Waheh Chnong ka Ladmyngngor u L. Siangchai hawa e u yei klam da pynsñiaw u i sñiawngooh wa khroo ya ka Party wa du ha ki khajak bnai wa dep wa yoh ko u synchaar hapoh ka JHADC da ye ko wow pynlait ya ki Dolloi ka ri-loom Jaiñtia nei chah pyndam chipor (suspend) heiwa da ye biang ki wow kreh u synchaar ya ki Elaka kam ki Dolloi wa pura.
U Kynsai Bareh hawa klam da ong u wa ha kani ka Election MLA wym em booh bru ki na kani ka Constituency neibhah wym em yoh ki u kyrtong wa yoo satar wow pynyakhun, tangwa hadien ka Result won da chynna yei rukom piah ki Vote, nalor wada em leh ki kyrtong wa paan ticket yakhun MDC 2019 naka UDP, katwa kamtæ ong u wa sñiawthooh wa hanpaya da emkaam u booh bru noh ha kani ka thaaiñ.
Kamtæ da kyntu u ya ki paidbah wa hadien wa pynbna ticket yow kyrtong wow yakhun na kani ka thaaiñ, toh u e i kyrchaan tylli tylla yow bru wa pynyieñ ka Party.
Kiwi won wa e i klam kynthup ki ya u Hirald Dkhar, u Phrang Dkhar wa u Dawan Lyngdoh.
Discussion about this post