Jowai: I angnood ki paidbah ka thaaiñ khappood khamtam kiwa chong wa sah ha thaaiñ Muktapur, ynne ka sngi da man i iwa sakhiat heiwa da wai pynkrehkaam ya ka Project pynmih bordiñ kawa tip kam ka 1.5 MW Lakroh Mini Hydel Project, kawa em ha chnong Lakroh, West Jaiñtia Hills.
Ya kani ka Project da wai pynkrehkaam ynne ka sngi ha ka yalang heiwa u montri ka chnat puræ puthi ka jylla, uwa man leh u MLA ka thaaiñ, u Lakhmen Rymbui da man u kam u kongsan hei emlang u DC ka District u Dykes LNS Garod, u SP ka District u Lakador Syiem wa ki heh ka chnat MEPGCL wa kiwi kiwi.
U Garod hawa e yei klam da yaroh u ya ka MePGCL wa da ye ko wow pynkrehkaam ya kani ka Project ka wow e chiboon i myntoi ya ki paidbah wa ki chnong ka thaaiñ.
Kam u kongsan ha kani ka sngi, u Lahkmen hawa e yei klam da ong u wa ki sahep ka MeECl man ki kiwa da chemphang bha katni heiwa da sakhi yeini da ki kreh yong ki ha ka Project wa heh kam ka Lechka HEP tangwa emkaam wow pyndep ya ki kreh hapoh i por wa da booh thong khnang wow ye u su ya ka ram wa chim na ki yung krehkaam waphær waphær.
Chooh chooh da ong u wa katkam wa man, i dor ka bai bordiñ na ka Pump House man i kamwa T. 1.58 donhi chi unit tangwa manda poi i cha yaaw cha chnong man i archah katwa kamtæ u man i iwa suk ya ka chnat wow su pyndep ya ki ram wa chim wow chna ya kini ki thaw pynmih bordiñ.
Ya ka parom kajiak hajrong i kreh ya kani ka thaw pynmih bordiñ da khana da u Director (Generation) MePGCL u EW Nongrum uwa da khana wa ha ka 31-03-2001 da yohbor wow chna ya kani ka Project hei lut wa kamwa T. 11 klur tam dei yoh yarap na ka MNRE wa ka NEC.
Ha ka 19-08-2003 da yoh ya ka NOC na ka Elaka Satpator wei ha ka 23-04-2004 da yoh NOC sa naka chnat Forest Department ka jylla, katwa ya ka NOC na JHADC da paan nadooh u Kmaichonglad 2003 tangwa da yoh ya ka du ha ka 27-06-2007.
Ha u snem 2005 da chna ya u sarok wa pynyabi ya kani ka thaw wa u sarok psiang dei yoh yarap na ka Border Area Development hei lut kamwa T. 80 lak. Ha ka 12-02-2009 da pynkylla yei lut yong i kreh ha kani ka thaw wei ha u snem 2013 da chem wa ki kor da man ki kiwa da sih iwa da pynsangeh yei kreh wei yeini ha u snem 2014 nei chimkhia u CMD wa katni uwa man leh kam u Chief Engineer (Generation) MePGCL da sdang biang wow thooh laad wow kreh pyndep ya kani ka project.
Ka poisa wa da yoh wow pyndep ya kani ka kaam man i waroh T. 21.43 klur heiwa na kani T. 6.75 klur da yoh na ka Ministry of Renewable Energy; T. 5 Klur na ka NEC wa kamwa T. 9.86 Klur na ka MeECL.
Ya ka yalang ha kani ka sngi da pynkut da ki kyntien e khublei na u CE (Civil), Maintenance & Small Hydro, MePGCL u B. Khonglah.
Ha kani ka sngi ya kani ka project da toh u wan wai da u montri rangbah ka jylla, u Conrad K Sangma chirup wa u montri ka chnat bordiñ, u James K Sangma tangwa neidaw wa sih i suiñbneiñ wei da pynkhreh ki wow wan da ka Helicopter kini ki ar ngut ymyoh de ki u wan cha kani ka thaw.
Discussion about this post