Ynne ka sngi heipor wa u montri rangbah ka jylla, u Conrad Sangma da lai u cha East Jaiñtia Hills da sakhi u yei yakhih wa pynman da ka Joint Action Committee (JAC) ha Takhniang, Tuber kawa da dawa wow pynkrehkaam noh ki karkhana pynmih khyndaw-bilat ya i dor bai kit mar katkam wa da booh ka sorkar.
Hajrong ini i sakhi u Conrad ya i yakhih, hawa kylli ya oo heiyatoh wa kani ka yakhih da ong u wa i dor bai kit mar ympu em u pynkylla ya ki nadooh u snem 2002 wei ini i dor da pteiñ i hadooh kini ki sngi katwa kamtæ kani ka sorkar MDA wa katni sñiawkhia ko yeini wei da chim ko ya ka rai wow pynthymme noh ya ini i dor.
Da pynrap u deiwa ong wa katni em i sñiawthooh bakla hapyrdi kiwa pynlai truck (Transporter) wa ki karkhana pynmih khyndaw-bilat wei i kaamram ka sorkar da kut i wei neiliang ka sorkar u chimkhia ko wow pynbait yeini heiwon iwon i por leh.
Hajrong ini i yakhih ka JAC ynne i step neiliang u Nidamon Shullet uwa man u President ka Jaiñtia Hills Truck Owners Association (JHTOA) kawa man ka seiñ wa em hapoh ka satri ka JAC da pynche u wa ini i yakhih ynne ka sngi ymtoh i yakhih pyrchah ya ka sorkar namo ya u montri rangbah ka jylla tangwa jia ryngkat i wa lai luti u heipor wa sdang yakhih biang ka Committee yeiwa da sdang hadien wa ym mano ki karkhana wow su ya i dor wa da booh ka sorkar.
Chooh chooh da ong u wa ka JAC hi ekhublei ko ya u montri rangbah ka jylla, u Conrad Sangma, u montri ka chnat Transport, u Sniawbhalang Dhar wa ya ka sorkar jylla hi leh waroh kawi wa hapyrdi wa em i khang neidaw u COVID-19 da chimkhia ki dei langær wow khut yalang wei wow pynthymme ya i bai kit mar ki truck.
U Nidamon da kyntu u leh ya waroh ki tre truck wa em hapoh ka jylla wow mih paidbah ki wow embynta ha ka yakhih khnang wow pynyoo yei yatylli wei wow poi ha ka thong deiwa maham u leh ya kiwa ym mih heiwa neiliang ka JAC daw pynchitom ko ya ki wei ini i pynchitom ye i wow man deiwa khang ya ki wow kit mar ki namo da kiwi tawon ki jait pynchitom.
