Uwa yahkhmat ka National People’s Party (NPP) uwa man leh u Symbood Montri Rangbah ka jylla, u Prestone Tynsong da ong u wa i yoh duna Vote ka NPP ha ka Election MDC cha GHADC ym em ko iwon iwon i ktah ya ka Party ha ka Election MLA, neibhah du hapoh 3-4 bnai ki paidbah da mylliñ ki.
Da ong u wa ka Party ka burom ko ya iyi wa kiwa chong chnong ka Garo Hills da e ki hawa yatoh wa ka Election MDC kawa da dep wow pynbna Result ynne ka sngi.
Ka NPP ha chwa wow niaw Vote da kop ko wow jop kamwa 18 Seat, tangwa i pynbna ya ka Result ynne ka sngi, ka NPP da jop ko du 11 Seat deiwa booddien ya ka Congress kawa jop 12 Seat.
Hajrong i chah rem noh ka NPP ha Tura kawa man ka Constituency kawa khlan yong ka Party, wa da mihkhmat da 2 ngut ki MLA ka NPP, kitæ u Montri Rangbah, u Conrad Sangma na South Tura wa u Thomas A Sangma na North Tura, neiliang u Prestone da ong bait u wa ka Party burom ko ya iyi wa da rai ki paidbah.
Hawa yatoh won wow chna ya ka Executive Committee, da ong wa u Montri Rangbah uwa man leh u President ka Party kattæ da em u ha Tura wei da rai wow chna ya ka EC kawa daw tip mynstep ka sngi.
Kam wow pynkynmoo wa u Prestone da jooh ong u wa ka Election ha GHADC man ko kam Semi Final neibynta u snem 2023, tangwa hawa kylli ynne ka sngi da ong u wa ka Election MLA wa MDC man ki jar jiar.
