Ynne ka sngi u montri rangbah ka jylla, u Conrad Sangma da pyntip u wa ka sorkar pyrdi da chah ko wow sdang i e tika (Dawai Yada) na u COVID-19 ya kiwa 18-45 snem i rta ya iwa toh u sdang nadooh ka 1 Naisan 2021 wei ka Registration katkam wa man hadooh katni dang lai i chaphrang.
Da ong u wa katkam wa man katni i dawai man i iwa duna bha la ha jylla wa ka ri hi waroh kawi wei ka sorkar jylla kamwa man kiwi da phah (Order) ko ya ini i dawai wei ye u chimpor hadooh le næ soo tayaw chwa wow yoh yutip na ki Company heiyatoh wa i dawai katwa kamtæ ymye wow sdang u e dawai na ka 1 Naisan 2021.
Da ong u leh wa ka sorkar pyrdi daw e ko kajiak chisien cha ki jylla ka ri ya i dawai deiwa pynrap wa daw sdang u e yei dawai kajiak chisien ha ki tayaw wow wan katkam ka Registration wa da dep leh.
Heijooh i por da pyntip u wa em ki jylla kiwa emkaam jhan rap boon ya ini i dawai kam ha Delhi wa Maharashtra katkam wa man ka khlam ha kini ki jylla katni.
Da kyntu u leh ya ki paidbah ka jylla wow man kiwa yaichah wei wow pteiñ ki wow Register pynyaki hi wei mar yoh ya i dawai daw sdang biang i e tika kamwa jooh.
