Ampati: Kiwa chong chnong ka Damdiloka kawa em hapoh ka Damalgre C&RD Block, South West Garo Hills da yoh ko ya ka Lower Primary School wa nyngkong ka chnong heiwa ya ka yung skur wa pura da wan booh moo yurim da u Montri Rangbah u Dr. Mukul Sangma ynnin ka 19 tarik.
Ya kani ka skur da sdang ya ka ha uni u snem wei ya ka yung wa pura u chna heidor wa T. 15 Lak kawa da pynkreh da ka Border Areas Development wa ka Education Department.
Chwa wow em kani ka skur, ki khynnah kani ka chnong haap lai kjat ki 2 Km cha ka skur wa jan dooh wa em ha Goragre.
U Dr. Mukul hei klam yong oo da ong u wa man i kaamram ka sorkar jylla wa ka sorkar pyrdi wow chna skur ha waroh ki chnong wei ka Damdiloka da yoh skur ko hadien 45 snem wa pynmih ya ka jylla Meghalaya iwa man wa sñiawsih.
Da ong u leh wa ka District South West Garo Hills tlot bha ko ha result SSLC ini wa dep wei mai u ki ki School Managing Committees kiwa pynkitkhlieh wow pait ya ka skur yow pyntikna wa ym sepai i puræ puthi ki khynnah.
“Lada ki khynnah wa puræ ha ki skur ki bru samen ye ki u leh bha heiwa ka tulop kiwa sikai duna ko ya kiwa sikai sorkar i yi i daw wa ki skur sorkar tlot ki khynnah ha ka puræ puthi?” Da kylli u Mukul.
Hanlada kattæ leh yooluti u wa kani ka skur daw wanrah ko yei kylla ha kani ka thaiñ wei da kyntu u ya ka School Managing Committee wow chimkhia ko yeiwa da pynkit ha ka yow yoh ki khynnah ya ka puræ puthi wa biang. Da ong u leh wa kiwa sikai hapoh kani skur u booh da kiwa da biang kyrdan.
Da pyntip u wa ka sorkar e poisa ko T. 5000 chibnai kawa arsnem cha kitu kiwa em i thrang wow man kam kiwa sikai yow pynbniah ki ya ki kaam sikai chwa wow sdang ki u sikai.
U Nokma kani ka chnong da ong u wa ki dadep dawa skur ki hapoh kani ka chnong kattu la 30 snem kamtæ sñiawngooh u wa da yoh ya kani ka skur kawa da wai ha u Thohlakhmi (February) uni u snem.
Discussion about this post