Hadien 2 snem wa ka jylla da chah ktah ko ha u khñiang kjut COVID-19, ynne ka sngi 28 tarik uwi u bru uwa yoh ya uni u khñiang da khlaad noh u.
Uni u bru toh uwa 46 snem i rta na ka thaaiñ West Garo Hills. Katkam wa khana ki heh ka chnat i chait i khiah ini i khlaad yong uni u bru hapoh jylla na kani ka kjut wan i hadien 6 bnai.
Ka Montri wa pait ya i chait i khiah, ka Dr. M Ampareen Lyngdoh hawa klam wa kiwa pathai khubor da kyntu ko ya ki paidbah wym toh u khuslai wei emkaam wow man ki wow yada pyn ya idæ.
Neiliang ka Montri da ong ko wa ka chnat daw chim ki nongmuna (Sample) yong uwa khlaad wow tip lada chah ktah u du na u COVID-19 namo da em kjut chwa u deiwi tawon.
Ka Dr. Ampareen da kyntu ko leh ya ki paidbah wym toh u khuslai ki tangwa wow man kiwa syndong wei lada sñiaw ki wa em i phær ha i man i long wow lai wut-wut cha ki thaw sumaar.
Chooh chooh da ong ko wa kitu kiwa wan na baar jylla kiwa em sñiaw phær hei doh i pran hap ki wow sap Mask la kammon kammon 5 hadooh 7 sngi.
Hajrong itæ ka Montri da ong ko leh wa i dawai tika chong ha i sñiawthooh ki paidbah, wei neiliang ka chnat daw yachem ko ya u Montri Rangbah ha ka Sngi Dep Bibar ka tayaaw wow wan wow pynbait yei emkaam ki tika.