Ynne ka sngi u montri rangbah ka jylla, u Conrad Sangma chirup wa ki arngut ki montri ka sorkar u Lahkmen Rymbui wa u Kyrmen Shylla da wan booh u ya u mooyurim wow chna ya ka yung thymme ka Rymbai Government Secondary School, Rymbai East Jaiñtia Hills.
Ha kani ka sngi da em ka yalang wa tbian heiwa u Waheh Chnong ka Rymbai, u Justice Lyngdoh da e u ya ki kyntien pdiang burom wa i klam na u Principal Secretary ka chnat Education, u DP Wahlang uwa da ong wa ini i skur da man i iwa da sih bha wei emkaam bha wow chna pynmiat noh ya ka.
Da khana u wa ya kani ka skur da sdang ha u snem 1960 wei da man ko kam ka Upper Secondary School hadooh u 2006 heiwa da pynku kyrdan noh ya ka cha Secondary School wei da krehkaam ko na kani ka jooh ka yung la 14 snem wei kani ka yung skur wa thymme u chna ya ka hei lut iwa T. 3.70 klur.
Neiliang u montri ka chnat Social Welfare uwa man leh u MLA ka thaaiñ, u Kyrmen Shylla hawa e yei klam da ong u wa da sñiawngooh ya u montri rangbah ka jylla wa u montri ka chnat i puræ puthi neibhah wa ki paidbah do yooluti bha ki wow yoh noh da ka yung skur wa thymme ha ini i thaw wei da angnood leh wow pynku kyrdan noh ya ka cha ka Higher Secondary School.
U montri ka chnat puræ puthi, u Lahkmen Rymbui hawa e i klam da ong u wa ynne u man ko ka sngi wow sahkynmoo deiwa ong wa man i iwa emkaam bha wow em i krehlang wow wanrah yei kylla ha i puræ puthi.
Da ong u wa heipor wa lehkmen dap snem ka skur dang pyrkhat wow e ya ki kamra Class namo ki Additional Classroom tangwa kmen u wa daw yoh ko ya ka yung thymme.
Chooh chooh da ong u wa ka sorkar da yaleh ko wow e yarap ya ki skur tangwa emkaam u pyrkhat wa kammon u myntoi ka mynried na kini ki yarap wa e ka sorkar.
Kam u kongsan ha kani ka sngi, u Conrad da ong u wa kwah u wow yoo wa ku ka jylla hapoh ka ri deiwa thung ya ki bru ha ki thaw wow pynjanai yei sap yong ki wei kiwi na ki thaw toh ki thaw puræ kam kani ka skur.
Da kular u wow chimkhia wow pynku ya i puræ puthi hapoh ka jylla neibhah du i stat i tip iwa ye u wanrah yei kylla deiwa yaroh ya i yatylli hapoh ka chnat puræ puthi kiwa kreh chitom wow pynku ya i stat i tip hapoh ka jylla.
Da kyntu u leh ya ki yung ki sem kamjooh ka chnong ka thaw wow wanrah yei kylla ym du ha i puræ puthi tangwa wot ha kiwi ki bynta leh.
Ya ka yalang ynne da pynkut da ki kyntien ekhublei na ka Headmaster ka skur, ka D. Lathong.
Ha kani ka sngi da ki emlang ki MDC wa kynthup ya u Lasky Rymbai wa u Sankey Shangpung, da emlang leh ki waheh Balang, kiwa sikai ka skur wa kiwi kiwi.
