Ynne ka sngi, ka National People’s Party Ialong Unit da pynman ko yaka yalang pynkup burom ya u Wailadmiki Shylla, MLA ka 2-Jowai Constituency kam ka dak wow e mynsien ya oo yow thooh chooh chooh u ki laad ki luti neibynta u wanrah i roi i paar hapoh ka chnong ka thaw.
Ha ka yalang pynkup burom wa pynlai da u Bichar Shylla, President NPP Unit Ialong da yoh i klam yahkhmat na u General Secretary, NPP Unit Ialong, na u President ka NPP Youth Wing, na ki waheh dong waphær waphær ka chnong Ialong wa kynthup ya u Bud Lyngdoh yong ka dong Khlieh Chnong, u Lehbha Phawa yong ka Khliehphyrnap, u Iaiap Rymbai yong ka dong Mission, u Rimi Dhar yong ka chnong Thymme, u Phomli Pale yong ka dong Mulang, u Niwes Shylla yong ka Luti Tuber wa kiwi kiwa da e yaroh leh ya u Wailadmiki Shylla hajrong i chimkhia yong oo u wanrah ki kaam pynroi hapoh ka chnong Ialong ha kini ki 5 snem chadien deiwa kyntu leh wow nang thooh chooh chooh u ki laad ki luti yeiwa duna kamjooh kiwa sahteiñ.
Neiliang u Assistant waheh chnong ka Ialong, u Juhi Pale hawa klam da khana u ya ki yurim wa ki paidbah ka chnong e kyrchaan biang ki ya oo ha kani ka kynti toh wa yoo ki dang ha ki 5 snem leh boon i roi i par rah u.
Kamtæ katkam ka dorkhat wa da e kti ki ha oo, da kyrpaad ki yow pyndep u yei kaam wa sahteiñ, kamjooh leh da pynsñiaw u ya iwa boon i duna wa kynthup i puræ puthi, ki sarok luti syngkeiñ, i yalehke Sports, ki laad yoh khih yoh kreh, ki laad pynyoh Scheme yong samen kamjooh leh ki laad yarap neibynta ki warep.
U Wailadmiki Shylla hawa e yei klam ong u, “Wym ye de O u ñiaw yei burom wa kani ka chnong da e da chaniah ko ha nga, ka chnong Ialong man ko kawa phær bha hapoh Constituency yong nga neibhah man ko ka chnong wa burom wei maya yei roi i paar”.
Katwa man ka chnong wa maya yei roi i paar khana u wa ha uni u snem 2023 wym em de hap u wow psiah yung li kyrpaad ya ki paidbah u kyrchaan ki ya oo heiwa pna ki hi wa wan cha oo wow khana yei kwah ki u kyrchaan oo neidaw wa yoo ki yei roi i paar. Wei i yoh Vote u leh ku i boon chah neiwa yoh u ha u 2018.
“Phi kam ki paidbah da pyndep phi yei kaamram, iwa sah won toh sa nga u dooh thiah neibynta u pynyoh yei emkaam i dawa yong phi,” ong u Wailadmiki.
Heijooh i por kyntu u ya ki paidbah wow man kiwa yaichah wei wot kitu ki lok ki wym em kyrchaan leh toh u mylliñ noh ki yei kaam Election khnang yow ku ka chnong, neibhah da tip ka chnong wa ku i roi i paar toh kawa em i yakrehlang.
Wei kam kiwa rem toh u pynchlur u tynrooh ki ha kiwa jop yow yahluti ki neibynta iwon iwon i emkaam ka chnong ka thaw wym toh wow khanglaad næ man deiñ pynthut ya iwon iwon i myntoi wa toh u yoh ka chnong.
Ha kani ka sngi da kular u leh wow e chwa T. 10 lak naka MLA Scheme yong oo cha ka chnong Ialong khnang yow yoh ko u thied Power Tiller neibynta i emkaam ki warep ka chnong katwa yeiwa tam won ye ki u pynlai cheiwi won ki kaam.
U Wailadmiki Shylla ha kani ka sngi chim haroh u ka laad wow pynche cha ki paidbah wa ya ka chuki Minister daw ksoh u ka hadien 2 snem chiteiñ. I daw wa jia kamni toh wa duna i jop ka NPP ha Khasi Jaiñtia wei wym yoh leh yaka Single Majority te hap wow e bhah ya kiwi ki Party wa ya krehlang.
