Shillong: Chi bnai tam hadien wa da ieh noh u yei kaam kam u MLA ka Ranikor Constituency, uwa yakhmat warim ka Congress, u Martin M Danggo, ynne ka sngi da psiah noh u cha ka National People’s Party (NPP) heiwa da pynsñiaw u yei mynsien wa skem wow dang jop u ha ka Election chiteiñ samoi.
U Danggo, uwa da jop san sien na Ranikor, da pdiang burom ya oo da u State President ka NPP, u Dr. WR Kharlukhi ha ka yalang kawa da man ha yung krehkaam ka Party ha Shillong ynne ka sngi.
U Danggo da iehnoh u kam u dkhot ka Yung Dorbar Chna-aiñ ka Jylla ha ka 21 Naiynru hadien wa ka sorkar da pynbna ko wow pynku kyrdan ya ka Ranikor Administrative Unit cha ka Ranikor Civil Sub-Division ya kawa da wai ha ka 10 tarik uni u bnai.
Hawa klam wa kiwa pathai khubor, u Danggo da ong u wa dap u dei mynsien wa kmen wei sñiawngooh wow psiah noh cha ka NPP deiwa kular wow leh ya iwa bha tam wow e chakri neibynta kawon kawon ka ka kaam wa daw e ha oo.
Da ong u wa ka thong wa ha khmat dooh wa psiah u ha ka kaam saiñ pyrthai toh wow pynyoh ya ka Civil Sub-Division ha ka thaaiñ Ranikor, wei da ong u wa ini da sah i nadooh u snem 2005 wei ki sorkar wa lai ym em u ye ki u pynman kaam yeini i angnood ki paidbah.
Ha i jooh i por da yaroh u ya ka sorkar Meghalaya Democratic Alliance (MDA) wa da yahkhmat da ka NPP wa u Conrad K Sangma kam u Montri Rangbah.
Discussion about this post