Ka KHADC da pynbaad ko ya ki bor District ka Ri-Bhoi wa da leh ki palat yei bor deiwa khang ya ka khyrdop namo ka Trade Check Gate ka Council wa em ha Umdihar khlem da pyntip chwa.
Neiliang u EM ka KHADC, u Powell Sohkhlet da ong u wa kani ka khyrdop toh kawa da wai ha ka 15 tarik uni u bnai tangwa da khang ka pyn ha ka sngi wa bood wei da ong u wa ini toh deiwa leh yabor khlem da tip yei bor ka Council katkam wa da booh hapoh ka Sixth Schedule.
Da kylli u leh wa iyi jooh leh ki bor District nachwa heipor wa em kiwa khrong poisa na kiwa kit syiar wei ini da pynyoo wa da leh chiliang ki.
Da pynche u wa kani ka khyrdop toh kawa da booh da ka chnat Trade ka KHADC wei da yoh NOC leh na ki bor ka chnong wei kiwa em ha kani ka khyrdop toh kiwa pynbiang leh ya ki Receipt.
Neiliang won u Winston Tony Lyngdoh uwa man leh kam u EM ka chnat khayi pateiñ ka KHADC, da ong u wa da bood ki ya waroh iwa toh u leh wei da phah leh ya ki kot ki sla cha u SP wa u DC wei wot ki pulit leh da em ki ha kani ka thaw ha ka 15 tarik.
Da ong u leh wa ka KHADC hadooh kattæ ym pu em yoh ko yei pynche na ki bor District yei daw wa khang ya kani ka khyrdop deiwa pynrap wa ym em chna thymme ya ka khyrdop tangwa kani toh kawa da em nadooh nachwa.
Da pyntip u leh na ki 11 tylli ki khyrdop ka KHADC, da em du 6 tylli kiwa krehkaam wei da em leh 3 tylli kiwa dadep chah khang.
Da khana u leh wa kani ka khyrdop toh yow khrong dan ya ki kari wa kamai wa wan na baar Meghalaya kiwa khih hapoh u pood ka KHADC.
Discussion about this post