Khliehriat: U kyrtong ka UDP na 6-Khliehriat Constituency u Kyrmen Shylla ynne ka sngi da pynman u ya ka yalang paidbah ha chnong Rymbai, East Jaiñtia Hills heiwa da wan sakhi ya ka da ki hajar ki paidbah na kylleiñ ka Constituency khamtam ka chnong Rymbai.
Ha kani ka yalang paidbah da wan embynta leh da ki MDC ka JHADC kam u Lasky Rymbai, u MLA warim ka thaiñ u S. Siangshai, u MLA ka Shillong West uwa man leh kam u Working President ka UDP u Paul Lyngdoh, wa kiwi kiwi.
U Paul Lyngdoh hei klam yong oo da beiñ u ya kiwa mihkhmat na Ri-loom Jaiñtia deiwa ong wa manda man Dorbar ka sorkar oo lai u man ka sngi tangwa waroh chi kattu ymjooh yoo u wa ang i ktien ki MLA na Ri-loom Jaiñtia hapoh Assembly wei ang ki du heipor wa rkhai wei wa dih cha donhi.
Weiwa sñiawsih u wow yoo wa rman wa kyrha ki (MLA) du heipor Election donhi deiwa pynrap wa ka montri puræ puthi ka sorkar, ka Deborah Marak da pyntip ko wa em hadooh kamwa chi lak ngut ki khynnah ki wympu em u pyndep ya ka Matric (SSLC) yong ki hapoh ka jylla wei chiteiñ na kitæ toh kiwa na ri-loom Jaiñtia.
Hei yatoh won wa ki National Party da kylli u wa ki party kiwa em da ki hajar kilometre na kani ka jylla kammon ye ki u rai yeiyi u e ticket? Wei da pynrap u leh deiwa ong wa kammon batai ki neitai yeiwa emkaam hapoh Jowai, Rymbai wa Shillong neibhah i por da toh wow chim noh ya u chabi na Delhi wow e noh ka laad wow synchaar da ki seiñ ri-loom pyn ya ka jylla hi.
Kam u kyrtong kani ka Constituency u Kyrmen Shylla da ong u wa oo kam u kyrtong em u i kitkhlieh wei itæ i kitkhlieh ymtoh u man i du ha oo donhi manda chah jied u tangwa nadooh kiwa kitkaam chnong hadooh ki paidbah leh toh u em ki i mynsien wa sñiaw yei em i kitkhlieh ya waroh.
Da ong u wa ki paidbah da yoo ki yi wa jia ha kini ki san snem wa da lai wei da toh u khyrngiat noh ki neibhah ka mynried yong ka Constituency wa ka jaitbru em ko ha ka kti yong ki paidbah waroh.
Da kular u leh wa ki kaam kiwa dang sahteiñ kiwa da wanrah da u MLA warim, u Nehlang, u pyndep noh ya ki ha kani ka kynti lada chah jied u kam uwa mihkhmat ka Constituency.
Heijooh i por da ong u wa ym pynjoor u dei klam tangwa ki san snem wow wan ki dak ki wow kreh u ki wow klam hadooh wa ym-em de ki wow yieñ yaleh pyrchah ya oo neibhah waroh ki paidbah daw kyrchaan noh ki ya oo.
Ha kani ka sngi da yoh leh yei klam na uwi na ki MLA warim ka thaiñ u Nehlang Lyngdoh uwa da ong wa da boon ki kaam kiwa da sdang u heipor wa man u kam u MLA wei da kyntu u ya waroh wow elaad ki paidbah ka Constituency ya u Kyrmen wow pyndep ya kiwa dang sah ki kaam.
Heijooh i por da kyntu u ya ki khon ka chnong Rymbai wow kyrchaan pura ki ya u Kyrmen ha kani ka kynti.
Discussion about this post