U montri ka chnat i chait i khiah uwa man leh u MLA ka BJP na Pynthorumkhrah, u Alexander Laloo Hek ynne ka sngi da kyntait u wa em i yapiah hapoh ka Party, ini i kyntait da wan i hadien wa mih i dawa na u President ka BJP Meghalaya, wa u Montri ki kaam pohyung ka jylla toh u hiar chuki u hajrong i yap ki 6 ngut ha i thaw tih moo ha ka tayaw wa dadep.
Kam wow pynkynmoo heini, u President ka BJP, u Ernest Mawrie da dawa u wow hiar chuki noh u Lahkmen Rymbui hadien wa yap kiwa khih mooyong ha Dainshalalu, East Jaiñtia Hills khnang wa i takit u lai i chaphrang wei wow man i takit iwa laitlooid.
Heiyatoh wa ini da mih ki kyntien artatien na ki 2 MLA ka BJP, heiwa u Sanbor Shullai da ong u wa ini i klam u Mawrie, ka Party ymtip ko, katwa u AL Hek da kyrchaan u yei dawa u Mawrie deiwa ong wa ini i pynbaad wa i dawa toh u kyrchaan ya ki da ki sabut.
Neiliang u Hek da ong u wa ka BJP ha Meghalaya da man ko iwi donhi khlem iwon iwon i piah wei i klam u Sanbor Shullai toh i pynsñiaw yong oo samen donhi wei u Mawrie em u i yong oo hi i sñiaw deiwa pynrap wa emkaam ya ki sabut wa biang.
