Ynne ka sngi ha ka yalang pyrchah ya ka Check Gate ka Karbi Anglong Autonomous Council (KAAC) da em i lai paidbah na Madanbol Khanduli wa da chimbynta da kiwa chong chnong na kiwi ki chnong kam na Namdong, Saitsama wa ki seiñbhalang na Ri-loom Jaiñtia wa kynthup ya ka JSU, KSU, FKJGP, EJNC, JSM, HANM, HYC, ka Border Dispute Redressal Forum wa kiwi da chimbynta ki ha ini i lai paidbah heiwa ya ka yalang da pynlai da Yooshida Nongspung uwa man u waheh chnong ka Khanduli.
Ha ka yalang neiliang u President ka HNAM da dawa u wow pynbait noh ya u pood wa ka Assam kamjooh wow pyndam noh ya ka Assam Re-organisation Act 1951 kamjooh wa i bhah kreh na ka sorkar pyrdi du neibynta ka Meghalaya (Cadre).
Ha kani ka sngi da em ki sahep sorkar na waroh arliang tangwa ki paidbah da rai ki wow sangeh yei khayi pateiñ hapyrdi ki Pnar wa ki Karbi ha khappood.
Kam wow kdaw heini ka Assam da phah ko ya ki Central Reserved Police Force (CRPF) ha ka Check Gate wei hadien ka yalang ha Madanbol ka Khanduli kiwa mihkhmat ki seiñbhalang wa ki sahep chirup wa ki pulit da lai pait ki ya ka Check Gate ka KAAC heiwa ka Deputy Commissioner ka West Karbi Anglong, ka Krishna Buruah da yaklam ko wa ki seiñbhalang na Ri-loom Jaiñtia.
Hadien i yaklam ka Krishna Buruah da kular ko wow pyndooh ya kani ka Check Gate wei wow kyrriah ya ki pulit na Khanduli.
U Yooshida da ong u leh wa mar kyrriah ki ya kani ka Check Gate heitæ u sdang biang i khayi pateiñ hapyrdi ki ar jaitbru.
