Hadien wa pynbaad ki 3 ngut pyrchah ya ka Khasi Hills Autonomous District Council (KHADC) hajrong i rukom krehkaam yong ka ha u Lat ka jylla heiyatoh wa iwa jia ha Ichamati wa Bholaganj, wei khnang wow pynche ko yeini i pynbaad, neiliang ka Council ynne ka sngi da rai ko wow thung da ka ‘Special Committee’ wow takit wei wow e ya ka bui hapoh 10 sngi.
Yeini da ong u Chief Executive Member, u Titosstarwell Chyne hadien ka yalang ka Executive Committee deiwa ong wa ini i pynbaad da ktah i yei man i long ka District Council wei ya i bor yong ka iwa da yah bakla ya u Lat ka jylla wei wot ya kiwa em cha baar ka jylla leh heiwa hadien wa yoh ya ka bui ka takit, daw ye u pynche yeini i chah pynbaad.
Da ong u leh wa ka KHADC katkam ka riti synchaar ka ri India neibynta wow yada ya ki jaitbru ri-loom wei da em leh ki kyndon wow pynlai ya ki kaam khayi pateiñ da ki bru na baar toh lyngba ka Trading by Non Tribal Act heiwa emkaam ki wow yohbor ki na ka Council wei katkam wa man katni em hadooh 4000 ngut kiwa da yoh ya ka Trading Licence, wei ym jooh em i pyndik ya kiwa kwah u yohbor.
Heijooh i por da ong u wa i rukom e namo pynthymme ya ki Trading Licence chong i ha ki kyndon wa da booh ha ka aiñ wei i bor wow e ya ka Trading Licence toh du hadien wa yoh ya ka No Objection Certificates na ki rangbah shnong.
Hajrong i pynbaad wa thung ya kiwa synchaar ha ki chnong næ ki Raid wa Hima, u CEM da kyntait u ya ini i pynbaad kini ki baar jylla wa ka Council da thung ko du kiwa ngait niam Christan wei deiwa pyndam ya kiwa ngait ya ki niam wa man tynre, wei hajrong ini da pynche u wa ya kiwa da pyndam ka Council da leh ko yeini toh hajrong ki ujor wa ki kyndon, deiwa pynrap wa kiwa boon na kiwa synchaar toh kiwa ngait ya ka niam tynre.
Chooh choh da ong u wa i ujor pyrchah yong kini ki bru toh iwa ym poi cheiwon cheiwon leh tangwa ka KHADC daw yang ko ya ka bui na ka Special Committee chwa wow leh yeiwa emkaam.
