Ka State Women’s Conference kawa nyngkong dooh hajrong ka phang “Support and Celebrate” da pynman ya ka ynne ha State Convention Centre, Shillong heiwa da wan wai ya ka da u Montri Rangbah ka jylla, u Conrad K Sangma hei emlang u Montri ka chnat bhalang, u Kyrmen Shylla, ka Chief Secretary, ka Rebecca V Suchiang, u Principal Secretary, Social Welfare, u P S Kumar waka Chairperson, Meghalaya State Women’s Commission, ka Phidalia Toi.
U Conrad hawa e yei klam da ong u wa kani ka Conference toh kawa heh dooh ha ka jylla hadien boon tylli ki snem. Da ong u wa kani ka Conference toh kawa boon dooh kiwa chimbynta heiwa da pait leh ya ka Online da kamwa 2 lak ngut ki bru na ki 46 Block ka jylla.
Da pyntip u wa kani ka Conference da pynman ya ka hadien ka yalang waka Meghalaya State Women’s Commission khnang wow ye u yaklam ya ki kaam wa yatoh wa ki kynthai, ki manbei wa ka imlang sahlang.
Chooh chooh da ong u wa ka Women’s Commission em ko i bynta wa khroo wow pynyajan ya ki manbei waka sorkar wei da thmu wow pynman yaka Women’s Conference man-u-snem heiwa i kreh yong ki kamjooh ki kynthai wa pawnaam u yoh ki u yachemlang.
Da wai u leh yaka Early Childhood Development Mission wei da pynlait u leh ya ka kot Booklet wow kynmoo ya kani ka sngi kamjooh leh ya ka 181 Helpline.
Ha kani ka sngi ka Montri ka sorkar pyrdi, wa pait yaka Women & Child Development, ka Smriti Zubin Irani, da e khublei ko wa da sdang ya kani ka Conference deiwa pynsñiaw leh yei mynsien wa kmen yaka sorkar jylla. Da yaroh ko leh yaka sorkar wa da pynkupbor ko ya ki kynthai deiwa ong wa man iwa emkaam wow chakri ya ki kynthai wa ki khynnah. Da yooluti ko leh wa kani u man ko ka nongmuna ya kiwi tawon ki jylla ka ri.
Ha kani ka sngi da yaklam leh hajrong ka phang ‘The Gender Gap in Decision Making in Meghalaya and Ways to Promote Women’s Leadership’ wa ‘Women’s Rights and Voice, Women’s Health and Safety- Analysis of the Present Scenario and the Way Forward’ da ki muktiar, kiwa sikai, ki bru wa kreh bhalang, ki Doctor wa kiwi kiwi.
