Ha ka yalang yalap Election u kyrtong ka NPP, u Sniawbhalang Dhar na ka 1-Nartiang Constituency wa da pynman ynnin ka 13 tarik, da man ko kawa chongchit deiwa em hadooh 25,000 ngut kiwa kyrchaan yong oo kiwa da ya wan cha kani ka yalang wa da pynman ha chnong Khanduli katkam wa da kheiñ kiwa pynman.
Da ya emlang leh ha kani ka yalang wa u CEM ka JHADC, u Thombor Shiwat, u MDC ka Moodymmai-Ummulong, u Jesse Suiam wa kiwa yahkhmat na waroh ki chnong hapoh ka Constituency.
Da yoh yei klam pdiang na u waheh chnong ka Khanduli uwa da yaroh ya u Sniawbhalang Dhar yei lehbha u ya ka chnong deiwa ong leh wa ki kam ka chnong wa haap ha khappood, nadooh wa man MLA u Sniawbhalang da man sakhiat i kyrkhu neibhah wa u Sniawbhalang ym em ieh u ya ki samen ha ki por wa chah pyndik ha ka Assam wei da ong u leh wa ka chnong Khanduli daw e biang ko yei kyrchaan wa pura ya u Sniawbhalang Dhar ha kani ka kynti leh.
Da yoh leh i klam na u Jesse Suiam, MDC ka Moodymmai-Ummulong uwa da ong wa ha ka Constituency yong oo ya katni ki bru da e ki i kyrchaan wa pura ya u Sniawbhalang Dhar hadooh le pawa.
Neiliang won u CEM da ong u wa ha u 2018 heipor wa pynman yalang ha kani ka thaw, ki bru dap ki du chiteiñ kani ka madan wei u Sniawbhalang da jop u da ar hajar tam ki Vote tangwa hawa pait won ynne ka sngi da pynkhyrngiat ya oo wa ym mutdur wa u paidbah u ya wan ki hadooh katni wei ngait skem u wa ha kani ka kynti wa u Sniawbhalang Dhar daw jop u da 8,000 chaneiñ, da kyntu u leh ya ki paidbah ki wym kyrchaan wow pyrkhat arsien noh khnang wa ym sihlet de ki hadien.
Khaddooh da yoh i klam na u kyrtong ka NPP, u Sniawbhalang Dhar uwa da e khublei nyngkong dooh ya u paidbah wa hadooh katni pynyoo ki yei maya yong ki wei ym poi pyrkhat u wa u paidbah daw wan u hadooh wow tam 20,000 chaneiñ wei ini da pynyoo che wa ki paidbah ka 1-Nartiang Constituency man ki kiwa stat wow jied ya kiwa mihkhmat wei da e ki da ki soh wa bha ya kiwa da ye u leh ha kini ki 5 snem wa da lai noh.
Da khut kyrpaad u leh ya ki paralok ki wym pu kyrchaan ya oo wow kylla thiah kylla dem yow e yei kyrchaan ya oo khnang wow nang ye u leh rap boon ki kaam pynroi hapoh ka Constituency.
U Sniawbhalang da pynyknmoo u leh wa ha i por yong ka Congress kawa em hei bor ha Assam wa Meghalaya wei leh kamjooh ha sorkar pyrdi ym em ye ki wow pynbait ya u pood u ang tangwa nadooh wa wan ka sorkar NPP hapoh i yahkhmat u Conrad Sangma kam u Montri Rangbah da ye wow pyndep yei pynbait pood wei katni dang sah sa du ka Block-I wa Block-II wei oo man u kam u Chairman yong kani ka Committee wow pynbait ya u pood u ang yong ka Jaiñtia Hills waroh.
