Shillong: I thap pyrtuid ki kyrtong wow yakhun ha ka Election MLA 2018 dang boon ki i ynne ka sngi heiwa da em hadooh 27 ngut ki kyrtong kiwa thap pyrtuid ha waroh kawi ka jylla wei du ha East Khasi Hills da em hadooh 12 ngut ki kyrtong kiwa da thap pyrtuid ha yungkrehkaam u Deputy Commissioner.
Napyrdi kini kiwa da thap pyrtuid kynthup ki ya u kyrtong na Pynursla, u Prestone Tynsong (NPP), u Horju Donkupar Roy Lyngdoh (INC) na Sohiong, u Remington Pyngrope (NPP) na Mawkynrew, u HS Shylla (NPP) na Nongkrem, u Pyniaid Sing Syiem (NPP) na Mawryngkneng wa u Adelbert Nongrum (KHNAM) na North Shillong Constituency.
Hawa klam hadien i thap pyrtuid neiliang u Prestone da ong u wa ka NPP daw jop ko hadooh 31 tylli ki Constituency wei daw yahkhmat ko yei synchaar hapoh ka jylla.
Da ong u wa i pynbaad ka Congress wa ka NPP toh kajooh wa ka BJP toh du neidaw wa ym em ko iwon iwon u klam cha ki paidbah ha kani ka Election.
Da ong u wa lada ka NPP wa ka BJP man ko ka jooh, ka BJP ym pynyieñ kyrtong ko ha ki Constituency wa ka pynyakhun ka NPP kamwa da leh ha Pynursla kawa man ka Constituency yong oo.
Katwa neiliang u HS Shylla da ong u wa ki paidbah kwah ki ya ki District Council deiwa pynjop suk ya oo na Nongkrem neibhah wa u MLA wa katni thmu u wow pyndooh ya ki District Council.
Da pynbaad u wa u MLA wa katni ym em u klam u iwon iwon ha yung dorbar chna aiñ hajrong ka MUDA tangwa da kbai da awri hi-eh u ha sarok ha ki thaw khapsor daw ktah bha ko ya u MLA wei ki paidbah leh da ngiah ki ya u MLA wa katni.
Neiliang u HDR Lyngdoh da pynsñiaw u wa daw jop biang u ha kani ka Election na Sohiong wei da kam u wa nalor kiwa kyrchaan yong oo, waroh ki kur wa kiwa ha yung oo kyrchaan ki ya oo.
Heijooh i por da kubur u wa ka diah khaddooh yong oo wa u pyrsa u da lai kyrchaan ki ya u wow yaleh pyrchah ya oo, u Samlin Malngiang da ong u wa ini man i ka kaam yung.
Heijooh i por u Lyngdoh u da kam u wa ka Congress daw synchaar biang ko samen hadien ka Election hapoh ka jylla.
Katwa u working president ka KHNAM uwa man u kyrtong na North Shillong, u Adelbert Nongrum da pynsñiaw u yei mynsien kyrmen wow jop ha kani ka election neibah wa oo man u u bru uwa yieñ ha ka yurim hanlada man ko ya ki Khasi namo ya kiwi tawon ki jaitbru kiwa man ki tre ka jylla.
Heijooh i por u kyrtong ka KHNAM na Mawlai, u BL Nongbri da ong u wa i daw wa mih u wow yakhun ya ka Election toh wow wanrah ya ki Policy neibynta ki warep, ki khynroo khyllood ki wow chakri ya ka jylla hi waroh kawi.
Da ong u wa ki paidbah ka Mawlai lada kwah ki yei kylla, toh u elaad ki ya ki bru kiwa thymme wow leh yeini.
Da pynrap u deiwa ong wa i jop næ rem ki kyrtong chong ha ki paidbah wei lada yoobiang ki ya u kyrtong daw man hi u uwa jop.
Discussion about this post