Hadooh ka 3 tarik ka Lockdown, ki 7 tylli ki bynta wa emkaam u leh wa tyrwa u PM Modi

U montri rangbahdooh ka ri, u Narendra Modi ynne hawa klam ya ki paidah ka ri da pynbna u wa ka Lockdown namo i khang chnong ha waroh kawi ka ri u krehkaam ko hadooh ka 3 tarik u Naisan (May).

Da ong u wa sñiawthooh u yei eh wa chem ki paidbah ka ri la hei baam, i lai i wan wa i jngai na yung katwa kamtæ da kyntu u ya ki paidbah wow emkaam wow em ki i kitkhlieh neibynta ka ri.

Da ong u leh wa kani ka por toh ka por wow lehkmen wa ki lehniam wa ha rukom ha kiwa boon ki jylla wei da yaroh u ya ki paidbah wa da lehkmen ki ha i rukom wow bood ya ki kyndon ka Lockdown.

Da ong u leh wa ka India da ye ko u khang yei poor u khniang neibhah chwa wow yoh ki 100 ngut, ka India da booh kyndon ko chong kset ha yung hadooh 14 sngi khamtam kiwa wan na baar ri. Da khang leh ya ki Mall, Club, ki Gym wa kiwi kiwi ki thaw paidbah wei heipor wa em 550 ngut kiwa yoh COVID-19 ha India da rai noh wow pynkrehkaam ya ka Lockdown wa 21 sngi.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Chooh chooh da ong u wa ka India da myntoi bha ko na ka Social Distancing wa ka Lockdown wei wot hadooh ki sorkar jylla leh da chimkhia bha ki yeini.

Hawa pynbna wow pynkrehkaam biang ya ka Lockdown hadooh ka 3 tarik da kyntu u ya ki paidbah wow bood ya ki kyndon ka sorkar.

Da ong u leh wa hadooh ka 20 tarik uni u bnai daw sylli yei pynkhreh ya ka Lockdown ha ki chnong, ki Police Station, ki District, wa ki jylla wei hajrong ini daw pait kammon da yarap wow yada na uni u khniang wei du hadien itæ wow ye u rai kammon wow pynyinsur ya ka Lockdown ha kini ki thaw.

Ya i pynyinsur daw rai hadien ka 20 tarik khnang wow lait u chah ktah kiwa khih mylla sngi wa kiwa dooh wa duk.

Da ong u leh wa kani ka samoi toh ka samoi wow thung wow bet wei kam ha kini ki por ka sorkar pyrdi waka sorkar jylla yaleh ki wow pynsuk ya ki warep.

Da booh u leh ya ki 7 tylli ki bynta wa emkaam wow bood ki paidbah wei kini man ki kamni hawah:

Nyngkong:

Wow sumaar ya kiwa da heh rta wa kiwa da tymmen ha ki yung ki sem khnang wow yada ya ki.

Wa Ar:

Wow bood ya ki kyndon ka Lockdown wei wow jngai iwi na iwi namo ka Social Distancing wei wow kah ya i khmut wa i ktien da ki Mask.

Wa Le:

Wow bood ya ki kyndon wa booh ka AYUSH Ministry wow yada ya i doh i pran wei wow dih ya ka um wa iñ.

Wa Soo:

Wow Download ya ka Arogya Setu Mobile App wow tip kammon wow yada na i poor uni u khniang wei wow kyntu ya kiwi wow download ya uni u App.

Wa San:

Wow yarap ya ki manyung wa dooh khamtam ki mar baam.

Wa Ynru:

Wow wyrai ya ki para wakreh wa ki wakreh wei ymtoh wow pyndooh kreh ya ki.

Wa Ynñiaw:

Wow burom ya kiwa yakhun pyrchah ya ka khlam u COVID-19 namo ki “Corona Warriors” kam ki Doctor wa ki Nurse, kiwa pynkhooid ya ki soodong sookun namo ki Sanitation Workers wa ki pulit.