Kharkutta: U montri rangbah ka jylla, u Conrad K. Sangma ynnin da lai u cha i thaw wa dang chem thymme wa tip kam i Rongma Gitil Eco-Tourism Destination ha Kharkutta, North Garo Hills, heiwa da em ka tamasa uiñke suwari wa ar sngi.
Nei miat wa i pynchohbiej ka Rongma Gitil, kawa ye wow riñ ya kiwa uiñke suwari, neiliang u Conrad da kular u wow e T. 50 lak wow pynpliah wei wow pynmiat ya kani ka thaw.
Da ong u wa lyngba ki chnat waphær waphær daw yaleh wow pynkylla dur noh ya kani ka thaw kawa em leh ya kawi ka krem wei da ekhublei u ya u MLA ka thaaiñ, u Rupert Momin uwa da chimkhia wow pynmiat ya ka.
U Conrad da pyntip u leh wa T. 300 klur da e da ka sorkar pyrdi wow pynmiat ya ki thaw uiñke suwari hapoh Meghalaya heiwa T. 100 klur toh da mang kongsan wow pynmiat ya ki thaw ha ri-loom Garo.
“Ka kaam uiñke suwari (Tourism) daw ye ko wow kynrong ya i dur wa i kyrdan ka jylla, wei ka kaam uiñke suwari daw ye ko u wailaad wow seiñkhih wei wow e kreh ya ki khynroo khyllood,” da ong u Conrad.
Da e nongmuna u leh ya ki jylla kam ka Goa, Sikkim kiwa sariem i man i long ki thaw nadooh i suiñbneiñ, ki dieñ ki siej, heini kini ki jylla pynku ki yoh i kot ki khynroo khyllood du na ka kaam uiñke suwari.
Da pynrap u deiwa ong wa ka kaam uiñke suwari ym ku ko khlem em ki sarok ki luti syngkieñ wa paka katwa kamtæ hapoh ka PMGSY ka mang poisa da pynku ya ka na ka T. 150 klur cha ka T. 500 klur.
Heijooh i por da pyntip u wa hadooh T. 18,000 klur da mang neibynta ki sarokbah (National Highway) ki wow yarap wow pynku ya ka kaam uiñke suwari wa kiwi kiwi ki kaam pynroi.
Da pyntip u leh wa ka North Garo Hills da bhah T. 253 klur wow pynkreh ya ki kaam pynroi liang wanang. Ka kaam song baam (Food Processing) ya ki ladaw, satroiiñ, khontara da kheiñkor ya ki wei ka Kharkutta daw yoh ko T. 2 klur neibynta ini.
Kiwi kiwa da em ha kani ka sngi toh u Rupert Momin, MLA Kharkutta, Marcus Marak Chief Whip, Jim Sangma MLA Rongjeng, Pongseng Marak MLA Bajengdoba, Deputy Commissioner, S. C. Sadhu wa kiwi kiwi.
Discussion about this post