Shillong: Ka chnat yalehke ka jylla dadep jied ko hadooh 50 acre ki thaw wow chna ya ki thaw yalehke namo ki stadium neibynta ka National Games ka wow man ha u snem 2022 ha kani ka jylla, wei ya ka poisa waroh da e yarap da ka Ministry of Social Justice & Empowerment ka sorkar pyrdi iwa kynjoh T. 300 klur.
Ya ini da pyntip da u Symbood Montri Rangbah ka jylla, u Prestone Tynsong hadien wa kut ka yalang ki montri ka sorkar jylla ynne ka sngi.
Hawa yaklam wa kiwa pathai khubor u Tynsong da ong u wa da yoh yei batai bniah na ka tnat yalehke hajrong i pynkhreh neibynta ka National Games iwa da pynhun jrut ya ki montri.
“Ynne ka sorkar da lai ko chakhmat wow pyndep yeiwa emkaam waroh neibynta ka National Games, emkaam i wow yoh ya kiwa pynwandur, uwa e yumut wa u Chief Executive Officer (CEO) neibynta wow pynlai chakhmat wow pynkhreh ya ka National Games,” da ong u.
U Tynsong da ong u wa manda yoh yeiwa emkaam waroh le daw tip won yei lut i sep wa iwa emkaam waroh deiwa pynrap leh wa i kaam da man i iwa lai bait chaaid chaaid wei ya kini ki le tylli kiwa emkaam toh u yoh chwa ka 15 tarik uni u bnai wow wan.
Heiyatoh wa i chna ya ka Games Village næ ki thaw sah yong kiwa yalehke, neiliang u Tynsong da pyntip u wa ka chnat yalehke da yoh ko yei thaw iwa heh 70 acre ha Mawdiangdiang wei hajrong ini ka sorkar jylla haap chim ko i bahkhlieh hajrong i lut i sep wow chna ya ka wei daw thooh leh ya ki laad ki luti wow pynman kaam yeini.
“Ka sorkar jylla daw pyndep bait ko ya waroh i emkaam neibynta ka National Games wei kyrmen i wow pyndep yeiwa emkaam heipor wa biang chwa ka yalehke,” da ong u Tynsong hawa jubab yeiwa da kylli.
Discussion about this post