Ar ngut ki bru da dooh noh ki yei mynsien hadien wa chah dat chah bom ha ki paidbah kiwa da chah pynbaad wa thmu ki wow slaitbor ya kawi ka kynthai kawa dang 18 snem ha i chnong wa tip kam i Nongthliew iwa dang em hapoh ka Eastern West Khasi Hills ynnin ka sngi.
Ka khubor na kani ka chnong da ong wa da jia ini ynnin heipor pyrdi sngi heiwa kini ki ar ngut da mut ki wow slaitbor ya ka kynthai kawa da em leh ki dak takha hei bynta i ryndang na ka tari wa sai kini ki bru.
Yeini wa jia da em wa yoo wei da kem ki ya kini ki bru heiwa da pyntip cha u Sordar chnong uwa da lai yah ya kini ki ar ngut cha yung kani ka kynthai heiwa da khana ko wa kini ki ar ngut da mut ki wow slaitbor ka wei da sai ki leh da ka tari yow maham ka.
Hadien ini da li yah ya kini ki ar ngut chapoh ka Community Hall yow e yada ki tangwa ka khubor wa jia ini da hær ko wut-wut wei da sdang ki bru wow yalang ha kani ka thaw.
Ki paidbah da psiah yabor ki chapoh kani ka Community Hall wei da sdang ki wow dat u bom ya kini ki ar ngut heiwa kiwa pynlai chnong ym ye de ki u leh iyi iyi yow khanglaad.
Ki paidbah da khanglaad ki leh yaki pulit manda poi ki wow chimkti ya kini ki bru tangwa hadien wa da jai-jia da kit ya kini cha Tirot Sing Memorial Civil Hospital wa em Mairang heiwa uwi da khlaad noh u uwa man leh kam u manpa wa em 6 ngut ki khon.
Ya uwi won da kit cha Shillong Civil Hospital ynnin hi heiwa da khlaad noh u heipor 11:30 i miet.
Discussion about this post