Ya ka President ka ri India, ka Droupadi Murmu ynne da man ko ka sngi wow neh parom heiwa da chong ko ya ka lieñsuiñ yapam Sukhoi 30 MKI ha Tezpur Air Force Station, Assam. Ka President kawa man leh ka Supreme Commander ki chipai ka ri, da hær ko kamwa 30 minit najrong ka wah Brahmaputra wa ki thaaiñ Tezpur wei da yoh ko leh wow yoo ya ki loom Himalaya chwa wow hiar biang ko ha kani hi ka Air Force Station.
Ya kani ka Fighter Jet da pynhær da u Group Captain Naveen Kumar, Commanding Officer ka 106 Squadron. Kani ka lieñsuiñ da hær ko chajrong kamwa 2 Km na sla duriaw deiwa hær smat 800 Km/h.
Ka President Murmu da man ko leh ka President wa le wei ka President kynthai wa ar wa da leh yeini.
Hadien hawa thoh ha ka kot kiwa wan ke (Visitor’s Book), ka President da ong ko wa ini wa da yoh ko wow maad ynne toh iwa da pynchongchit bha yei mynsien wow yoh u hær da ka Sukhoi-30 MKI Fighter Jet ka Indian Air Force wei ini toh i sarong yei ye ka India wow yada ya u pood u ang lada na khyndaw, na suiñ wa na duriaw. Kamtæ da e khublei ko ya ka Indian Air Force kamjooh ya waroh kiwa em ha ka Air Force Station Tezpur wa da e laad ki ya ka wow leh ko yeini.
Ya ka President da khana haroh ya ka yei bor kani ka Fighter Jet kamjooh i rukom krehkaam ka Indian Air Force (IAF) heiwa ka da pynsñiaw ko yei sñiawhun yei pynkhreh ki chipai ka IAF.
Ini i chimbynta ka President ynne toh kam chibynta wow pynyajan wa ki chipai ka ri neiliang yong ka kam ka Supreme Commander yong waroh ki jait chipai ka ri.
Kam wow pynkynmoo wa ha u bnai wa dep, ka President da lai ko leh cha ka jhaad INS Vikrant kawa man leh kam ka jhaad wa kit ya ki lieñsuiñ wa da chna ha India hi.
