Shillong: Hajrong i jia ha Syntung ha ka 8 tarik uni u bnai heiwa da dooh uwi yei mynsien wei da mynsoo ki 3 ngut kiwa na ka thaaiñ Lumbaskuk, Madanrting, neiliang ki pulit da pyntip ki wa mar yoh yutip yeiwa jia da lai ki cha kani ka thaw wow leh yeiwa emkaam.
Hadien wa takit bniah, ki pulit da chem ki wa em 9 ngut ki khynroo wa lai baamdoh cha chnong Syntung, tangwa heipor wa thmu ki wow liwan yung da chah yang-khap ki ha ki paidbah hapoh ka chnong Passang kiwa da sdang u dat u bom ya ki hajrong i suba wa man chohnoh ki.
Ha ini i chah dat chah bom ki paidbah ymap de ki ya kini ki khynroo wei da yawan leh wot ki bru ja ki chnong wa marjan.
Neiliang ki pulit kiwa da hiar chwa da phah wan pulit chooh chooh hadooh wa ye u pynlait noh ya kini ki khynroo wa mynsoo wa kiwa yut rieh.
Neiliang ki bor pulit hadien wa chem ya ki sakhi wa biang, da lai takit biang ki yeiwa jia ha chnong wei da kem noh ya ki 27 ngut ki bru wa suba wa man kiwa hakhmat wow yahkhmat wow dat u bom ya kini ki khynroo hadooh wa da khlaad noh uwi.
Napyrdi kiwa chah kem hawa bichaar bniah da chem wa ar ngut na kini toh kiwa dang khynnah (hapoh 18 snem) katwa uwi won u tymmen wei da pynlait noh ya ki.
Ynne ka sngi ya kiwa da chah kem da yah ha Kasari ka District Session Judge ka East Khasi Hills kawa da pymih hukum wa ya ki soo ngut wa da suba joor wow yahkhmat ya ki paidbah u kset ha Police Custody 3 sngi wow takit bniah da ki pulit katwa ya ki 20 ngut da phah booh hapoh ka Judicial Custody.
Discussion about this post