U Lat ka jylla Meghalaya da e bor u wow pynman yaka Dorbar wa nyngkong ka GHADC hadien wa dep wow pynman Election katkam ka aiñ Sub-Rule (5) ka Rule 36 wa Sub-Rule (1), (2), wa (4) ka Rule 32 ka Assam & Meghalaya Autonomous District (Constitution of District Councils) Rules, 1951.
Kani ka dorbar toh u pynman haka 19 tarik uni u bnai heipor 11 waje i step ha District Council Hall, Tura yow pynsmai ya ki MDC wa dang chah jied wei da booh won yei por 11 waje i step kani ka 21 tarik yow jied ya u Chairman ka GHADC.
Da phah ya u DC ka West Garo Hills District wow pynlai ya kani ki yalang kamjooh wow pynsmai ya ki MDC wa thymme ka Council.
Kam wow pynkynmoo wa ka BJP Meghalaya da maham ko wow lai ujor ha u Lat ka jylla mynstep ka 19 tarik yei chna EC wa thymme wa em 15 ngut ki MDC wa yahkhmat daka NPP deiwa ong wa emkaam wow yoh yei kyrchaan ki 17 ngut ki MDC yow ye u chna EC.
