Haka 19 tarik u saam ka KSU Narpuh Circle yaka Mait Shaphrang Academic Award

Jowai: Ka KSU Narpuh Circle daw saam ko yaka khusnam “8th Mait Shaphrang Academic Award 2019″ cha kitu ki khynroo khyllod wa lai puræ ka thaaiñ Narpuh kiwa wan ha ki kyrdan 1^st Division ha ka Exam SSLC, HSSLC wa Degree. Ya kani ka khusnam u saam ha ka 19 tarik uni u bnai ha Holy Cross Higher Secondary School Umkiang ha i por 12:30 i sngi. Kani man ko kam wow pyntip cha waroh kitu kiwa lai puræ ka thaaiñ Narpuh kiwa da pynpoi ya ki Marksheet yong ki dang ha kini ki kajiak tayaw wa da dep, wow sñiawbha ki wow wan wan mih ha katai ka tarik wa i por ha ka thaw wa da kdaw haneiñ khnang wow yoh ki u pdiang ya ka khusnam (Award) yong ki. Ha i jooh i por ka seiñ ha chwa wow saam ya katai ka khusnam, daw pynman ko yaka Awareness Program hajrong ka phang “Drugs Abuse” ya kawa batai wei pynche da ki bru chemphang na ka chnat ka chait ka khiah. Ini toh katkam ka kyrwoh na u Yooni Muksor, Education Secretary ka KSU Narpuh Circle.